बोदवड (प्रतिनिधी) तालुक्यातील अमदगाव येथील पवन नारायण राणे (वय २०) याने आज दुपारी आमदगाव शिवारातील शेतात लिंबाच्या झाडाला गळफास घेऊन आत्महत्या केली. पवन हा काही दिवसांपासून वडिलांवर असलेल्या कर्जामुळे तणावात होता.
पवन राणे याने संजय मुकुंदा कोलते यांचे आमदगाव शिवारातील शेतात लिंबाच्या झाडाला गळफास घेऊन आत्महत्या केली. मृत पवन नारायण राणे हा घरातील कर्ता पुरुष होता व त्याच्या वडिलांच्या नावे एचडीएफसी बँकेचे ४ लाख ५० हजार रुपये घेतलेले पीक कर्ज कसे फेडावे?, या मानसिक तणावात होता. याच तणावातून त्याने स्वतः दोराच्या साह्याने गळफास घेऊन आत्महत्या केली. त्याच्या पश्चात वृद्ध आई-वडील व एक लहान भाऊ त्यालापण अर्धांग वायू झालेला आहे.
तर आई वडील वृद्ध असल्याने पवन हा घरातील एकमेव कर्ता व कमवता पुरुष होता. त्याचे शवविच्छेदन आज बोदवड ग्रामीण रुग्णालयात करण्यात आल्यानंतर मृतदेह कुटुंबाच्या स्वाधीन करण्यात आला. त्यानंतर अत्यंत शोकाकुल वातावरणात त्याच्यावर अंत्यसंस्कार करण्यात आले आहे. याप्रकरणी गावात हळहळ व्यक्त केली जात आहे. उमेश वसंत नारखेडे यांच्या खबरीवरून बोदवड पोलीस स्टेशनमध्ये अकस्मात मृत्यूची नोंद करण्यात आली असून पुढील तपास पोलीस सचिन चौधरी करीत आहे.
