अमळनेर प्रतिनिधी । भरधाव वेगाने जाणाऱ्या अज्ञात वाहनाने दिलेल्या धडकेत शेताकडे पायी जात असलेल्या गुलाब तुकाराम पाटील (वय ५५, रा. म्हसले ता. अमळनेर) हे जखमी झाले होते. त्यांच्यावर जळगाव येथील शासकीय वैद्यकीय महाविद्यालयात उपचार सुरू असतांना त्यांची प्राणज्योत मालविली. याप्रकरणी पोलीसात अकस्मात मृत्यूची नोंद करण्यात आला आहे. असे मयत शेतकऱ्याचे नाव आहे.
गुलाब पाटील हे आपल्या आईवडील, पत्नी, दोन मुले, एक मुलगी यांच्यासह राहत होते. शेती काम करून परिवाराचा उदरनिर्वाह करीत होते. मंगळवारी ३० जुलै रोजी संध्याकाळी ७ वाजेच्या सुमारास म्हसले गावाकडून शेताच्या दिशेने जात असतांना मागून भरधाव वेगाने येणाऱ्या अज्ञात वाहनाने त्यांच्या दुचाकीला जोरदार धडक दिली. या धडकेत ते जबर जखमी झाले होते. त्यांना तातडीने ग्रामस्थांनी व कुटुंबीयांनी जळगाव येथील खाजगी रुग्णालयात उपचारासाठी दाखल केले होते. तेथून बुधवारी ३१ जुलै रोजी दुपारी दीड वाजता शासकीय वैद्यकीय महाविद्यालय व रुग्णालयात उपचारार्थ दाखल केले असता उपचारदरम्यान संध्याकाळी सहा वाजेच्या सुमारास त्यांना वैद्यकीय पथकाने मयत घोषित केले. यावेळी कुटुंबीयांनी एकाच आक्रोश केला. सदर घटनेची नोंद पोलीस स्टेशनला करण्याचे काम सुरू होते. पुढील चौकशीला सुरूवात करण्यात आली आहे.