पुणे (वृत्तसंस्था) पिंपरी- चिंचवड शहरालगतच्या चिखलीमधील पूर्णानगरमध्ये एका हार्डवेअरच्या दुकानाला लागलेल्या भीषण आगीत एकाच कुटुंबातील चार जणांचा होरपळून मृत्यू झाला. काळीज चिरणारी ही घटना बुधवारी पहाटेच्या सुमारास घडली. याच हार्डवेअरच्या दुकानात वास्तव्यास असलेल्या संपूर्ण कुटुंबाचा या आगीत अंत झाला. मृतांमध्ये पती-पत्नीसह दोन लहान मुलांचा समावेश आहे.
चिमणाराम बेणाराम चौधरी (४८), नम्रता चिमणाराम चौधरी (४०), भावेश चिमणाराम चौधरी (१५), सचिन चिमणाराम चौधरी (१३, सर्व रा. पूर्णानगर, चिखली, पिंपरी-चिंचवड, पुणे) अशी मृतांची नावे आहेत. चिखली पूर्णानगरमधील पूजा हाईट्स इमारतीच्या तळमजल्यावर चौधरी कुटुंबीयांचे सचिन हार्डवेअर ॲण्ड इलेक्ट्रिकल नावाचे दुकान होते. या दुकानातून घरात वर जाण्यासाठी जिना होता. दुकानात पहाटे अचानक आग लागली. दुकानात पेंटिंग डबे असल्यामुळे आगीने भीषण रूप धारण केले. बाहेर पडण्यास मार्ग नसल्यामुळे हे कुटुंब आगीत होरपळून मृत्यू पावले.
या दुर्घटनेची माहिती पहाटे ५ वाजून २३ मिनिटांनी पिंपरी पालिकेच्या अग्निशमन दलाला मिळाली. अग्निशमन दलाची चिखलीतील गाडी पाच मिनिटात घटनास्थळी पोहोचली. अग्निशमन दलाने पोहोचल्यानंतर ही आग नियंत्रणात आणली. परंतु, भीषण आगीमुळे चौधरी कुटुंबीयांचा त्यापूर्वीच अंत झाला होता. दरम्यान, हार्डवेअरच्या दुकानात ही आग शॉर्टसर्किटमुळे लागल्याचा प्राथमिक अंदाज अग्निशमन दलाकडून व्यक्त होत आहे.
सचिन हार्डवेअर अॅण्ड इलेक्ट्रिकल्सच्या दुकानात ही आग लागल्यानंतर महावितरणकडून तत्काळ वीज पुरवठा खंडित करण्यात आला. शॉर्टसर्किट झाल्याने ही आग लागल्याचा अंदाज आहे. तसेच गंभीर घटना असल्यामुळे महावितरणच्या अधिकारी, कर्मचाऱ्यांच्या पथकाने घटनास्थळी पाहणी केली. यामध्ये दुकानात मीटरपर्यंत वीजपुरवठा सुरळीत असल्याचे, वीजमीटर व सर्व्हिस वायर सुस्थितीत असल्याचे निदर्शनास आले. तर, आग शॉर्टसर्किटमुळे लागल्याची शंका व्यक्त होत असल्यामुळे राज्य शासनाच्या विद्युत निरीक्षक विभागाच्या अधिकाऱ्यांकडूनही पाहणी करण्यात आली. पुढील चौकशी विविध सरकारी यंत्रणेच्या संयुक्त समितीकडून केली जाणार आहे.
