मुंबई (वृत्तसंस्था) राज्य सरकारने धनगर समाजाला आदिवासी समाजातून आरक्षण देण्याच्या हालचाली सुरू केल्या आहेत. यामुळे आदिवासी समाजाच्या आरक्षणाला धक्का लावू नये, या मागणीसाठी विधानसभेचे उपसभापती नरहरी झिरवळ यांच्या नेतृत्वाखाली मंत्रालयजवळील महात्मा गांधी पुतळ्यासमोर आंदोलन करण्यात आले. आदिवासींमधून धनगरांना आरक्षण नको, अशी भूमिका झिरवळ यांनी या वेळी मांडली. दरम्यान, सरकारच्या आश्वासनानंतर संध्याकाळी आंदोलन मागे घेण्यात आले. मात्र, राज्यात धनगर आणि आदिवासी समाज अशा नव्या वादाला तोंड फुटण्याची शक्यता आहे.
विधासनसभा निवडणुकांच्या पार्श्वभूमीवर धनगर समाजाला आदिवासी समाजातून आरक्षण देण्याची तयारी सुरू केली आहे. त्यामुळे आदिवासी समाजातून धनगर समाजाला आरक्षण देऊ नये आणि पेसा भरती सुरू करावी, या प्रमुख मागणीसाठी राष्ट्रवादी काँग्रेस पक्षाचे झिरवळ यांच्या नेतृत्वाखाली मंत्रालयाजवळील महात्मा गांधी पुतळ्याजवळ धरणे आंदोलन पुकारण्यात आले होते. मुख्य म्हणजे राज्य मंत्रिमंडळाची बैठक सुरू असतानाच सत्ताधारी पक्षाच्या आमदारांचे आंदोलन सुरू होते. आदिवासी समजाच्या आरक्षणाला धक्का अशी भूमिका लावू नका, आदिवासी समाजाने सतत मांडली आहे. आरक्षणावर मात्र, सरकारने कोणताही निर्णय न घेतल्याने आमदार सरकारच्या विरोधात उतरले. आदिवासी कोट्यातून धनगर समाजाला आरक्षण देण्याच्या हालचाली सुरू आहेत. वास्तविक सर्वोच्च न्यायालय व उच्च न्यायालयातही हा विषय टिकलेला नाही. तरीही याचा पुन्हा पुन्हा आग्रह केला जात आहे आणि सरकार त्याला पाठिंबा देत आहे. सरकार या वेळी कोणालाही विश्वासात घेत नाही. आम्ही सत्तेत आहोत म्हणूनच यावर निर्णय घेण्यासाठी सरकारला भाग पाडू, असे झिरवळ म्हणाले.
