चाळीसगाव (प्रतिनिधी) अहिल्यादेवीनगर येथून सेंधवा येथे उसतोड कामगारांना घेऊन जाणारी बोलेरो पिकअप चारचाकी सोमवारी पहाटे ४ वाजेच्या सुमारास सोलापूर ते धुळे राष्ट्रीय महामार्गावरील खडकी शिवारातील एमआयडीसी भागात उलटली. या भीषण अपघातात १५ कामगार जखमी झाले आहेत. अपघाताची माहिती मिळताच पोलिसांनी धाव घेत या जखमींना उपचारार्थ रूग्णालयात दाखल केले आहे.
धुळे ते सोलापूर हायवेवरील चाळीसगाव एमआयडीसी परिसरातील हॉटेल जिव्हाळा समोर बोलेरो पिकअप (एमपी ४६, झेडएफ- १७११) ही ५ मे रोजी पहाटे ४ वाजेच्या सुमारास उलटली. अहिल्यानगर येथून मध्य प्रदेशातील सेंधव्याकडे ऊसतोड कामगार या वाहनातून जात होते. अचानक रस्त्यावर ही चारचाकी उलटून अपघात झाला. या वाहनात २४ ऊसतोड कामगार प्रवास करत होते. यापैकी १५ कामगार जखमी झाले आहेत. जखमींमध्ये ५ महिला व १० पुरुष कामगारांचा समावेश आहे. दरम्यान, या अपघाताची माहिती मिळताच चाळीसगाव शहर पोलीस ठाण्याचे पोलीस निरीक्षक किरणकुमार कबाडी यांच्यासह चाळीसगाव शहर पोलीस स्टेशनचे रात्रपाळीतील कर्मचारी तसेच महामार्ग विभागाचे पोलीस हवालदार रमेश पाटील, अजय पाटील, नितीश पाटील, पो. कॉ. केतन सूर्यवंशी, प्रवीण पवार, राहुल नारेकर यांनी घटनास्थळी तातडीने धाव घेऊन जखमींना रुग्णालयात उपचारार्थ दाखल केले होते. तर काही कामगारांवर प्राथमिक उपचार केल्यानंतर त्यांना घराकडे रवाना करण्यात आले आहे.
जखमींमध्ये यांचा आहे समावेश
जखमी कामगारांमध्ये मध्य प्रदेशातील सेंधवा येथील प्रीया सोलंकी (वय २४), नानी जातवा (वय ३०), शांतीलाल पांगिले सैलानी (वय ३५), पप्पू हिरालाल सोलंकी (वय १९), संतोष बळीराम सोलंकी (वय २१), सरीबाई सैलानी (वय ३५), राकेश रघुनाथ सोलंकी (वय १७), लालबाई बलराम सोलंकी (वय ४५), चिमा पटेल (वय ३०), सुरेश सोलंकी (वय २७), बलराम सोलंकी (वय ३०), संगीता बलराम सोलंकी (वय २८), दिनेश सुरेश सोलंकी (वय ३०), हिरालाल सोलंकी (वय २५) व संतोष हुडवे (वय २०) यांचा समावेश आहे. या जखमींना शहरातील ग्रामीण रूग्णालयासह खासगी रूग्णालयात उपचारार्थ दाखल करण्यात आले आहे.
