भरदिवसा रिक्षाचालकाच्या घरातून सोन्याचे मंगळसुत्र लांबविले
जळगाव प्रतिनिधी । जळगाव शहरातील गेंदलाल मिल परिसरात राहणाऱ्या रिक्षा चालकाच्या घरातून 25 हजार रुपये किमतीची सोन्याचे मंगळसूत्र चोरून येण्याची घटना बुधवारी १४ ऑगस्ट रोजी दुपारी १२ वाजेच्या सुमारास घडली आहे. याप्रकरणी शुक्रवारी १६ ऑगस्ट रोजी सायंकाळी ६ वाजता जळगाव शहर पोलीस ठाण्यात एकावर गुन्हा दाखल करण्यात आला आहे.
या संदर्भात मिळालेली माहिती अशी की, विजय सोमनाथ बाविस्कर वय-३४, रा. गेंदालाल मिल जळगाव हा तरुण आपल्या परिवारासह वास्तव्याला आहे. रिक्षा चालवून आपला उदरनिर्वाह करतो. दरम्यान बुधवारी १४ ऑगस्ट रोजी दुपारी १२ वाजता त्याच्या उघड्या घरातून फ्रिजवर ठेवलेले २५ हजार रुपये किमतीचे सोन्याचे मंगळसुत्र संशयित आरोपी प्रकाश नेकराम खरते उर्फ बारेला वय-२२, रा. कोतुर गाव सावदा ता. जळगाव याने चोरून नेली. ही घटना लक्षात आल्यानंतर विजय बाविस्कर यांनी शुक्रवारी १६ ऑगस्ट रोजी सायंकाळी ६ वाजता जळगाव शहर पोलिसात धाव घेवून तक्रार दिली. त्यानुसार संशयित आरोपी प्रकाश नेकराम खरते याच्या विरोधात शहर पोलीस ठाण्यात गुन्हा दाखल करण्यात आला आहे. या घटनेचा पुढील तपास सहाय्यक फौजदार सुनील पाटील करीत आहे.
