गोंदिया (वृत्तसंस्था) युवक वेगाने जाणाऱ्या डंपरला ओव्हरटेक करण्याच्या नादात आमगाव-गोंदिया महामार्गावर झालेल्या भीषण अपघातात दुचाकीस्वार तरुणाच्या शरीराच्या चिंधड्याच उडाल्या आहेत. दिनेश चंद्रप्रकाश पहिरे असं अपघातात मृत पावलेल्या 24 वर्षीय तरुणाचं नाव आहे.
मिळालेल्या माहितीनुसार, मृत दिनेश घटनेच्या दिवशी आपल्या वडिलांना सोडण्यासाठी आमगाव येथे गेला होता. वडिलांना सोडल्यानंतर तो पुन्हा आपल्या गोंदियाच्या दिशेनं येत होता. पण सध्या आमगाव-गोंदिया महामार्गवरील रस्ताचे काम सुरू आहे. दहेगाव येथून जात असताना दिनेशनं गोंदियाच्या दिशेनं जाणाऱ्या एका डंपरला ओव्हरटेक करण्याचा प्रयत्न केला. यावेळी संतुलन बिघडल्याने दिनेश डंपरच्या मागील चाकाजवळ पडला. या दुर्घटनेनंतर पुढच्याच क्षणात त्याच्या शरीराच्या चिंधड्या उडाल्या. याताच त्याचा दुर्दैवी अंत झाला. हा अपघात घडताच डंपर चालक घटनास्थळावरून फरार झाला. या घटनेची माहिती मिळताच पोलिसांनी घटनास्थळी धाव घेतली.
