पाचोरा(प्रतिनिधी) : सामनेर येथील एका हॉटेलवर मारहाण झाल्याची घटना ६ नोव्हेंबरला दुपारी घडली होती. दरम्यान, या भांडणात एकास गंभीर दुखापत झाली असून त्यांच्यावर मुंबई येथील के. ई. एम. हॉस्पिटलमध्ये उपचार सुरू आहेत. जखमीची प्रकृती चिंताजनक असून या प्रकरणी जखमी व्यक्तीच्या वडिलांनी १० नोव्हेंबर रोजी पाचोरा पोलिसांत दोन जणांविरुद्ध गुन्हा नोंदवला आहे.
पोलिसांनी दिलेली माहिती अशी की, सामनेर येथील पवनकुमार भागवत सूर्यवंशी (धोबी) व प्रमोद दिलीप पाटील हे ५ नोव्हेंबरला रात्री सामनेर गावानजीक असलेल्या एका हॉटेलमध्ये गेले होते. जेवण झाल्यानंतर हॉटेल चालक तसेच पवनकुमार सूर्यवंशी व प्रमोद पाटील यांच्यात जेवणाच्या बिलावरुन शाब्दिक चकमक होवून भांडण झाले. त्यानंतर ६ नोव्हेबरला दुपारी दीड वाजेच्या सुमारास पवनकुमार सूर्यवंशी व प्रमोद पाटील हे जेवणाचे बिल देण्यास हॉटेलवर गेले होते. या वेळी आदल्या दिवसाच्या भांडणाचा वचपा काढत पवनकुमार सूर्यवंशी व प्रमोद पाटील यांना बेदम मारहाण करण्यात आली. या मारहाणीत पवनकुमार यांच्या डोक्याला गंभीर इजा झाल्याने त्यास जळगाव जिल्हा रुग्णालयात दाखल केले होते. दरम्यान पवनकुमार यांची प्रकृती खालावत असल्याने त्यांना मुंबई येथील के. ई. एम. रुग्णालयात दाखल केले आहे. तर पवनकुमार यांची प्रकृती चिंताजनक असल्याचे समजते. दरम्यान, १० नोव्हेंबर रोजी पवनकुमार सूर्यवंशी यांचे वडिल भागवत सूर्यवंशी यांच्या फिर्यादीवरून पाचोरा पोलिस ठाण्यात पाचोऱ्यातील हनुमान नगरमधील आर्यन मोरे (पूर्ण नाव माहित नाही) व सामनेर येथील गोकुळ नेरपगार या दोघांविरुद्ध गुन्हा नोंदवण्यात आला आहे.
