जळगाव (प्रतिनिधी) जळगावकडून भडगावकडे निघालेल्या एकाला भरधाव ट्रकने रामदेववाडी गावाजवळ चिरडल्याची घटना घडली आहे. या अपघातात दुचाकीस्वाराचा जागीच मृत्यू झाला असून मुलगी गंभीर जखमी झाली आहे.
या संदर्भात अधिक असे की राजू दीपक कोळी (४५, रा. चारठाणा, ता. मुक्ताईनगर) हे शनिवारी दुपारी दुचाकीने भडगावकडे निघाले होते. मुलगी सोनी ही त्यांच्यासोबत होती. शिरसोलीच्या पुढील रामदेववाडी गावाजवळून शनिवारी दुपारी १२.३० वाजेच्या सुमारास जात असताना त्यांच्या दुचाकीला भरधाव ट्रकने धडक दिली. यात ट्रकचे चाक त्यांच्या डोक्यावरून गेल्याने त्यांचा जागीच मृत्यू झाला. तर मुलगी सोनी हिच्या पायाला गंभीर दुखापत झाली. जखमी मुलीवर खाजगी रूग्णालयात उपचार सुरू आहे.
