नालासोपारा (वृत्तसंस्था) गौराई पाड्याच्या वाढाण इंडस्ट्रीत कामावर जाणाऱ्या २२ वर्षीय तरुणीची लोखंडी पान्याने वार करत प्रियकराने मंगळवारी सकाळी ८.३० च्या सुमारास निघृण हत्या केली. मृत्यू झाल्यानंतरही त्याने तिच्यावर अनेक वार केल्याचे सीसीटीव्हीत दिसत आहे. हत्येनंतर प्रियकर मृतदेहाजवळ बसलेला असताना वालीव पोलिसांनी त्याला ताब्यात घेतले. आरती रामदुलार यादव (२२, उत्तर प्रदेश) असे मृत तरुणीचे नाव आहे. तर रोहित यादव (२९, रा. हरयाणा) असे आरोपीचे नाव आहे. तिचा मृतदेह शवविच्छेदनासाठी रुग्णालयात पाठवला आहे. याप्रकरणी वालीव पोलिसांनी हत्येचा गुन्हा दाखल करून तपासाला सुरुवात केली आहे.
सहा वर्षांपासून आरोपी तरुणीवर प्रेम करत होता. या प्रेमप्रकरणाची घरच्यांना माहिती होती. एक महिन्यापासून तिच्या वागण्यात बदल झाल्याचा संशय होता. तिचे दुसऱ्यासोबत प्रेमसंबंध असल्याच्या संशयातून त्याने रागाच्या भरात हे निघृण कृत्य केल्याचे पोलिसांनी सांगितले. तरुणी आणि आरोपी हे पूर्वी एकाच ठिकाणी राहत होते. दोघे एकमेकांना ओळखत होते. काही दिवसांपूर्वी रोहितने आरतीचा मोबाईल तोडला होता. तो मोबाईल दुरुस्त करून दे, असे तिने सांगितले. मोबाईल दुरुस्त करणार नाही, असे सांगून त्याने मारहाण करून शिवीगाळ केल्याची तक्रार आरतीने ८ जून रोजी आचोळे पोलीस ठाण्यात दिली होती. यासंदर्भात पोलिसांनी अदखलपात्र गुन्हा दाखल केला होता. त्याचवेळी आरतीने त्याच्यावर कारवाई करू नका, असे पोलिसांना सांगितले होते.
आरोपीला १४९ ची नोटीस बजावली होती, असे वरिष्ठ पोलीस निरीक्षक बाळासाहेब पवार यांनी सांगितले. त्यानुसार आचोळे पोलिसांनी पुन्हा असे करणार नाही, असे रोहितकडून वदवून घेतले होते. त्याचा राग मनात धरून मंगळवारी सकाळी तरुणी कामावर जात असताना लोखंडी पान्याच्या सहाय्याने वार करून हत्या केली. याप्रकरणी वालीव पोलीस ठाण्यात खुनाचा गुन्हा दाखल करून आरोपी रोहितला ताब्यात घेतले आहे. रोहितला तिच्याशी लग्न करायचे होते, मात्र तो बेरोजगार असल्यामुळे लग्नाला आरतीच्या घरच्यांचा विरोध होता, असे पोलिसांनी सांगितले. मृत मुलीची बहीण सानिका हिने आचोळे पोलिसांनी आरोपी रोहितवर कारवाई केली नसून, पैसे घेतल्याचा आरोप केला आहे. मात्र पोलिसांनी हे आरोप फेटाळून लावले आहेत. ८ जूनला रात्री ११.४५ वाजता तक्रार दाखल करण्यात आली. तसेच आरोपी रोहितवर १४९ प्रमाणे प्रतिबंधक कारवाई केली आहे.
