जळगाव (प्रतिनिधी) नकळत बनवलेला अश्लिल व्हिडीओ कॉल रेकॉर्डींग व्हायरल करण्याची धमकी देत एका तरुणाकडून १ लाख ४० हजार रुपयाची खंडणी उकळल्याप्रकरणी तीन अज्ञात मोबाईल क्रमांक धारकांविरुद्ध गुन्हा दाखल करण्यात आला आहे. धक्कादायक म्हणजे आम्ही क्राईम ब्रांच आणि युट्युबचे अधिकारी बोलत असल्याचे फोन करून ३२ वर्षीय तरुणाला धमकावण्याचा प्रकार काही दिवसांपासून सुरु होता.
नेमकं काय घडलं !
भुसावळ तालुक्यातील एका तरुणाचा नकळत बनवलेला अश्लिल व्हिडीओ कॉल रेकॉर्डींग व्हायरल करण्याची धमकी देणारे फोन दि.२१ ते २२ नोव्हेंबरच्या दरम्यान, काळात आले. पिडीत तरुणाला ७९९४३३८१०६, ७८५५०७७३८७, या मोबोईल क्रमांकावरुन काही अज्ञात लोक व्हॉअसअॅप कॉल व नियमीत कॉल करुन क्राईम ब्रांच व युटयुबमधून अधिकारी बोलत असल्याचे भासवत होते. तर अश्लिल व्हिडीओ कॉल रेकॉर्डींग व्हायरल न करण्याकरीता धमकी देत पिडीत तरुणाकडून ऑनलाईन वेळोवेळी एकुण १ लाख ३९ हजार ७४० रुपयाची खंडणी गुगल पेच्या माध्यमातून उकळली. याप्रकरणी अज्ञात आरोपींविरुद्ध गुन्हा दाखल करण्यात आला असून पुढील तपास पो.नि. लिलाधर कानडे हे करीत आहेत.
सेक्सटॉर्शनचे म्हणजे काय
आजकाल सायबर ठग लैंगिक ब्लॅकमेलिंग म्हणजेच सेक्सटोर्शनद्वारे लोकांकडून पैसे उकळत आहेत. सेक्सटॉर्शनचे म्हणजे वेबकॅम, मोबाईल किंवा व्हिडिओ कॉलद्वारे एखाद्या व्यक्तीच्या लैंगिक क्रियाकलाप किंवा नग्न चित्रे रेकॉर्ड करून ब्लॅकमेल करणे. शाळा-महाविद्यालयात शिकणारे तरुण, व्यापारी, राजकारणाशी निगडित लोक या रॅकेटचे बळी ठरतात.
या गोष्टी लक्षात ठेवा, फसवणूक टाळा
पॉर्न साइट्स सर्फ करू नका. फक्त सुरक्षित वेबसाइट उघडा. ज्या वेबसाइट्सच्या URL च्या आधी लॉक असेल त्यांना भेट द्या. लाल लॉकने चिन्हांकित केलेली वेबसाइट उघडणे टाळा. फ्रेंड रिक्वेस्ट स्वीकारण्यापूर्वी ती नीट तपासा. कोणी ब्लॅकमेल करत असेल, तर सायबर पोलिसांकडे तक्रार करा. अनोळखी लोकांशी संबंध ठेवताना काळजी घ्या.
