नाशिक (वृत्तसंस्था) मैत्रीचा गैरफायदा घेत एका संशयिताने मित्रांसह अल्पवयीन मुलीवर बलात्कार केल्याचा धक्कादायक प्रकार सिन्नर शहरात उघडकीस आला आहे. पीडितेने लग्नास नकार दिल्यानंतर अश्लील व्हिडिओ सोशल मीडियावर व्हायरल करण्याचा घृणास्पद प्रकारही संशयितांनी केला आहे. पीडित अल्पवयीन मुलीने दिलेल्या फिर्यादीवरून मुख्य संशयितासह तिघांवर गुन्हा दाखल करण्यात आला आहे. याप्रकरणी पोलिसांनी दोघांना अटक केली असून, मुख्य संशयित फरार झाला आहे.
पीडित मुलीने सिन्नर पोलिसांत दिलेल्या फिर्यादीवरून मुख्य संशयित अरुण नामदेव बोडखे (रा. गजानन महाराज मंदिराजवळ, भपूर, जिल्हा वाशिम), अनुराग व्यवहारे व अन्य एक अशा तिघांविरोधात सिन्नर पोलिसांत बलात्काराचा गुन्हा दाखल झाला आहे. संशयित बोडखे याची सिन्नर शहरातील एका अल्पवयीन मुलीसोबत ओळख झाल्यानंतर तो तिला शहरातील एका कॅफेमध्ये घेऊन गेला. तेथे त्याने अन्य एका मित्रासोबत मुलीला बळजबरीने शरीरसंबंध ठेवण्यास भाग पाडले. याशिवाय, मुलीला वारंवार दमबाजी करून आई-वडिलांना जिवे मारण्याची धमकी देत तिच्या भावासोबतही कुकर्म करण्यास भाग पाडले.
या अत्याचाराचा व्हिडिओ तयार करून बोडखे याने मुलीला लग्नाची मागणी घातली. मात्र, तिने नकार दिल्याने चिडलेल्या संशयित बोडखे याने पीडित मुलीचा अश्लील व्हिडिओ तिच्या नावाने इन्स्टाग्रामवर बोगस अकाउंट तयार करून शेअर केला. हा प्रकार सहन न झाल्याने पीडित मुलीने सिन्नर पोलिसांत फिर्याद दिली. याप्रकरणी सिन्नर पोलीस ठाण्याचे निरीक्षक राजेंद्र कुटे तपास करीत आहेत. याबाबतचे वृत्त आज स्थानिक माध्यमांनी दिले आहे.
