पाचोरा (प्रतिनिधी) गिरणा नदी पात्रातून चोरटी वाळू वाहतूक करणाऱ्या ट्रॅक्टरचे टायर फुटून झालेल्या अपघातात तरुण चालक जागीच ठार झाला. पवन हिंमत पाटील (वय २१, रा. चिंचखेडा खुर्द) असे मृताचे नाव आहे. अपघाताची घटना शनिवारी पहाटे तीन वाजेच्या सुमारास भडगाव रोडवरील निर्मल रेसिडेन्सी जवळ घडली. दरम्यान, मयत पवन आईवडिलांचा एकुलता एक मुलगा होता.
पवन पाटील हा कृष्णापुरी येथील एका इसमाच्या ट्रॅक्टरवर चालक म्हणून काम करत होता. शनिवारी पहाटे तीन वाजेच्या सुमारास गिरणा नदी पात्रातून वाळू भरून पाचोरा शहराकडे भरधाव वेगाने येत असताना हॉटेल निर्मल रेसिडेन्सी जवळ अचानक टायर फुटला. त्यामुळे चालकाचा वाहनावरील ताबा सुटल्याने ट्रॅक्टर चांदवड – जळगाव महामार्गावरील विजेच्या खांबावर आदळून एका बाजूला पलटी झाले. त्यात पवन पाटील यांच्या डोक्याला व चेहऱ्याला जबर मार लागल्याने तो जागीच ठार झाला.
घटनेची माहिती मिळताच ट्रॅक्टर मालक व त्याच्या काही साथीदारांना मिळताच त्यांनी तत्काळ घटनास्थळी जावून तुटलेला वीज खांब व वाळू दुसऱ्या वाहनात भरून पुरावा नष्ट करण्याचा प्रयत्न केला. दरम्यान, पवन हा आई-वडिलांचा एकुलता एक मुलगा होता. त्याचे वडील हिंमत पाटील हे सारोळा बुद्रुक येथे मजुरी करतात. पवन याच्या पश्चात एक बहीण व वृद्ध आई-वडील आहेत. त्यानंतर सायंकाळी चिंचखेडा खुर्द येथे मृत पवनवर अंत्यसंस्कार करण्यात आले.
