नांदेड (वृत्तसंस्था) अर्धी दारूण पिऊन झाल्यानंतर अर्धी बाटली कमरेला बांधून घरी जात असतांना अपघात झाल्यामुळे कंबरेला ठेवलेली दारूची बाटली फुटून पोटात घुसल्याने तरुणाचा मृत्यू झाल्याची घटना १० जुलै रोजी घडली आहे. अभिषेक संजय बारहाटे (वय २२), असे मृत तरुणाचे नाव आहे.
नांदेड शहरातील खोब्रागडेनगर येथील अभिषेक बारहाटे याने मद्यप्राशन केले होते. त्यानंतर नशेत असताना शिल्लक असलेली दारूची बॉटल समोरील बाजूने कंबरेला खोचून तो अण्णाभाऊ साठे चौकाकडून घराकडे निघाला होता. तो जोरात चालत जात असल्याने या मार्गावरील पेट्रोल पंपासमोर पायात पाय अडकून पोटावर पडला. सदर मार्ग सिमेंट काँक्रीटचा असल्याने जोरात आपटून कंबरेला खोचलेली दारूची बॉटल फुटून त्याच्या पोटात घुसली. त्यामुळे रक्तस्त्राव होऊन तो रक्ताच्या थारोळ्यात जागीच कोसळला. त्याला पुढील उपचारासाठी शासकीय रुग्णालयात दाखल करण्यात आले; परंतु रक्तस्त्राव जास्त झाल्याने त्याचा मृत्यू झाला, अशी माहिती पोलिसांनी दिली आहे. याबाबतचे वृत्त आज ‘लोकमत’ने दिले आहे.
