भुसावळ (प्रतिनिधी) शहरात ५ सप्टेंबर २०१७ रोजी श्री विसर्जन मिरवणुकीत झालेल्या वादातून ललित हरि मराठे (२६, रा. न्यू एरीया वार्ड, तुळजापूर मंदिराजवळ, भुसावळ) याचा खून झाला होता. या प्रकरणी आरोपी गोली उर्फ राजेंद्र उर्फ गणेश सुभाष सावकारे (२५, रा. न्यू एरीया वार्ड, तुळजापूर मंदिराजवळ, भुसावळ) याला आज सात वर्षे सक्तमुजरीची शिक्षा सुनावण्यात आली आहे. या खटल्यात एक विलक्षण योगायोग घडला. ज्या तारखेला मराठे याचा खून झाला होता, त्याच पाच सप्टेंबर रोजीच या खून खटल्याचा निकालही लागला.
शहरात ५ सप्टेंबर २०१७ रोजी श्री विसर्जन मिरवणूक सुरु होती. त्यात न्यू इंडिया सब्जी मंडळाचा कार्यकर्ता ललित मराठे व आरोपी गणेश सावकारे सावकारे यांच्यात किरकोळ कारणावरून वाद झाला होता. मिरवणूक बाजारपेठ पोलीस स्थानकाजवळ आल्यानंतर गणेश सावकारे याने ललित मराठे याच्या छातीच्या डाव्या बाजूस धारदार चाकूने वार केले होते. यात ललित मराठे याचा मृत्यू झाला होता. याप्रकरणी ललित याचा आते भाऊ धीरज मराठे याने बाजारपेठ पोलीस ठाण्यात दिलेल्या फिर्यादीवरून खुनाचा गुन्हा दाखल करण्यात आला होता.
याप्रकरणी भुसावळ येथील जिल्हा व सत्र न्यायालयात खटल्याची सुनावणी झाली. सरकार पक्षातर्फे ११ साक्षीदार तपासण्यात आले. सुनावणीअंती जिल्हा व सत्र न्यायाधीश आर. एम. जाधव यांनी आरोपीला सात वर्ष सक्तमजुरी व दहा हजार रुपये दंडाची अशी शिक्षा सुनावली. तसेच दंड न भरल्यास एक वर्ष अधिकची सक्तमजुरीची शिक्षा भोगावी लागणार आहे. या खटल्यात सरकारतर्फे सहाय्यक अॅड. प्रवीण भोंबे यांनी तर फिर्यादीतर्फे अॅड. प्रफुल्ल आर. पाटील यांनी काम पाहिले.
