भुसावळ (प्रतिनिधी) येथील दीपनगर वीज निर्मिती प्रकल्पाची १०० टन राख चोरून त्याची वाहतुक करणाऱ्या मोठ्या दोन डंपरवर एमआयडीसी पोलिसांनी कारवाई केली. ही कारवाई दि. १६ जून रोजी रात्री शिरसोली रस्त्यावर करण्यात आली असून ते डंपर जप्त करण्यात आले. या प्रकरणी एमआयडीसी पोलिस ठाण्यात दोन वाहनचालकांविरुद्ध गुन्हा दाखल करण्यात आला आहे.
भुसावळ येथभल दीपनगर वीज निर्मिती प्रकल्पातून मोठ्या प्रमाणात राख निघते. ही राख वेल्हाळा बंधारा येथे साठविलेली असताना तेथून (एमएच १, सीवाय ९७२९) आणि (एमएच ५२, ९०९९) या दोन मोठ्या डंपरमध्ये प्रत्येकी ५० टन असे एकूण शंभर राख वाहून नेली जात होती. दरम्यान, जळगाव शहरातील शिरसोली रस्त्यावर एमआयडीसी पोलिस ठाण्याचे पोउनि राहुल तायडे व त्यांचे सहकाऱ्यांनी दि. १६ जून रोजी रात्री गस्त घालत असताना त्यांना ही वाहने दिसली. त्यांनी वाहने अडवून तपासणी केलीअसता त्यामध्ये राख असल्याचे आढळून आले. दरम्यान, पोलिसांनी चालकाकडे राख वाहतुकीच्या परवान्याबाबत विचारणा केली. मात्र चालकांकडे कोणताही परवाना नव्हता तसेच त्यांच्याकडून उडवाउडवीची उत्तरे देखील दिली जात होती.
विनापरवाना केली जात होती राखेची वाहतुक
या विषयी एमआयडीसी पोलिसांनी दीपनगर केंद्राशी संपर्क साधून त्यांना प्रकाराची माहिती दिली. त्या वेळी केंद्राचे अधिकारी अमोत गिते हे लागलीच मध्यरात्रीच्या सुमारास जळगावात आले. त्यांनी राख वाहतुकीविषयी खात्री केली असता ती विनापरवाना नेली जात असल्याचे आढळून आले.
डंपरच्या चालकांविरुद्ध गुन्हा दाखल
या प्रकरणी गिते यांनी एमआयडीसी पोलिस ठाण्यात फिर्याद दिली. त्यावरून चालक शकील शब्बीर शेख (वय ४०, चाळीसगाव) व सुनील हरी राठोड (वय ३५ रा. वढरे, ता. चाळीसगाव) या दोघांविरुद्ध गुन्हा दाखल करण्यात आला आहे. पुढील तपास पोउनि सचिन नवले करीत आहेत.
