मुंबई (वृत्तसंस्था) बॉलिवूड अभिनेता अरमान कोहलीला मुंबई पोलिसांनी अटक केली आहे. शनिवारी संध्याकाळी अंमली पदार्थ विरोधी पथकाने अरमान कोहलीच्या मुंबईतील घरावर छापा टाकला होता. त्यावेळी अरमानच्या घरात काही ड्रग्ज अढळून आले. त्यानंतर अरमानची चौकशी करण्यात आली होती.
अभिनेता अरमान कोहलीच्या घरातून ड्रग्ज जप्त करण्यात आले होते. एनसीबीच्या मुंबई ब्रांचद्वारे ही कारवाई करण्यात आली असून शनिवारी अरमान कोहली आणि त्याचा मित्र अजय राजू सिंग यांच्यासह अनेक लोकेशन्सवर छापेमारी करण्यात आली. यावेळी २५ ग्रॅम एमडी जप्त करण्यात आले होते. एनसीबीने या ड्रग प्रकरणात क्राइम नं. ८२/२१ दाखल केला आहे. एनडीपीएस कायद्याअंतर्गत अरमान कोहलीला २१(ए), २७(ए), २८, २९, ३०, आणि ३५ या कलमांअंतर्गत अटक करण्यात आली आहे. तर NDPS Act अंतर्गत अजय राजू सिंग याला २२बी(ए), २७ए, २८, २९, ३० आणि ३५ या कलमाअंतर्गत अटक करण्यात आली आहे.
दरम्यान, या ड्रग केसमध्ये आंतरराष्ट्रीय कनेक्शनही समोर आलं आहे, कारण जप्त करण्यात आलेले कोकेन साउथ अमेरिकन ओरिजीनचे आहे. हे कोकेन कोणत्या मार्गाने मुंबईत आणले गेले, यामधील दुवे काय आहेत आणि इतर तस्करांबाबतचा शोध मुंबई एनसीबी करत आहे.
अरमान कोहली ‘बिग बॉस ७’मध्ये सहभागी झाला होता. त्यावेळी शोमध्ये त्याने अनेक वादग्रस्त वक्तव्य केली होती. त्यानंतर अरमानने बॉलिवूडचा भाईजान सलमान खानच्या ‘प्रेम रतन धन पायो’ या चित्रपटात काम केले होते. तसेच त्याने ‘दुश्मन जमाना’, ‘कोहरा’, ‘वीर’, ‘जानी दुश्मन’, ‘एलओसी कारगिल’ या चित्रपटांमध्ये ही काम केले आहे.
