धरणगाव : प्रतिनिधी
शहराची संस्कृती ही सर्व पक्ष व विचारांच्या आदराची आहे. एखाद्या नेत्याचे बॅनर फाडणे हा शहरातील शांतता व स्थैर्य मुद्दामहून धोक्यात आणण्याची विकृती आहे. या विकृत मानसिकतेचा जाहीर निषेध, अशा शब्दात शिंदे गटाने आदित्य ठाकरेंचे बॅनर फाडण्याच्या प्रकारावर आपली प्रतिक्रिया नोंदवलेली आहे.
शिवसेनेचे माजी नगरसेवक अभिजित पाटील यांनी सोशल मीडियात सर्वप्रथम याबाबत आपली प्रतिक्रिया नोंदवली. त्यात त्यांनी म्हटले की, शहराची संस्कृती ही सर्व पक्ष व विचारांच्या आदराची आहे. एखाद्या नेत्याचे बॅनर फाडणे हा शहरातील शांतता व स्थैर्य मुद्दामहून धोक्यात आणण्याची विकृती आहे. या विकृत मानसिकतेचा जाहीर निषेध. यानंतर शिंदे गटाचे ज्येष्ठ नेते तथा माजी नगराध्यक्ष पी.एम.पाटील यांनी सोशल मीडियात संदेश टाकला. त्यात त्यांनी म्हटले की, जळगाव जिल्हासह धरणगाव शहरात शिवसेनेचे युवा नेते आदित्यजी ठाकरे साहेब हे आज येत आहेत.
धरणगाव शहरात ‘शिव संवाद’ यात्रेच्या निमित्ताने छत्रपती शिवाजी महाराज पुतळ्याजवळ शिवसेनेने कार्यक्रमाचे आयोजन केले आहे. त्यानिमित्ताने गुलाबराव वाघ यांच्या नेतृत्वाखाली स्वागताची जय्यत तयारी केली आहे. ठिकठिकाणी बॅनर लावण्यात आले आहे. परंतू काही समाजकंटकांनी बॅनर फाडल्याचे निदर्शनास आले आहे. या कृत्याच्या बाळासाहेब ठाकरे शिवसेना व गुलाबराव पाटील साहेब समर्थक जाहीर निषेध करत असून ज्या कोणी अज्ञातांनी हे कृत्य केले असेल त्याच्या धरणगाव पोलिसांनी शोध घ्यावा. जो कोणी दोषी आढळेल, त्यावर योग्य ती कारवाई करावी. यासंदर्भात आम्ही स्वतः धरणगाव पोलीस निरीक्षक भेट घेणार आहोत. तसेच या कृत्याच्या आम्ही जाहीर निषेध करतो, असे म्हटले आहे.
