वर्धा (वृत्तसंस्था) वर्धा जिल्हा आरोग्य अधिकारी डॉ. अजय डवले यांना फोन करून शिवीगाळ केल्याप्रकरणी माजी मंत्री आणि काँग्रेसचे आमदार रणजित कांबळे यांच्यावर वर्धा शहर पोलीस ठाण्यात गुन्हा दाखल करण्यात आला आहे.
जिल्हा आरोग्य अधिकारी डॉ. अजय डवले यांनी पोलिसांत तक्रार केल्यानंतर शहर ठाण्यात महाराष्ट्र वैद्यकीय सेवा व्यक्ती आणि वैद्यकीय सेवा अधिनियम तसंच कलम ५०६ अंतर्गत गुन्ह्याची नोंद करण्यात आली आहे. वैद्यकीय सेवा व्यक्ती व संस्था विरोधात हिंसक कृत्ये अंतर्गत हा गुन्हा दाखल करण्यात आल्याचे ठाणेदार सत्यजित बंडेवार यांनी सांगितले आहे. देवळी मतदारसंघात आयोजित तपासणी शिबीरावरुन आमदार रणजीत कांबळे यांनी आरोग्य अधिकाऱ्याला शिवीगाळ केली होती. याबाबतची ऑडिओ क्लिपही व्हायरल झाली आहे.
असा घडला प्रकार
माजी मंत्री आणि काँग्रेसचे आमदार रणजित कांबळे यांनी थेट जिल्हा आरोग्य अधिकाऱ्यांना अर्वाच्य भाषेत शिवीगाळ करत जीवे मारण्याची धमकी सोमवारी दिली आहे. शिवीगाळ केल्याच्या संभाषणाची ऑडिओ क्लिप सोशल मीडियावर व्हायरल झाली असून, याप्रकरणी जिल्हा आरोग्य अधिकारी डॉ. अजय डवले यांनी थेट जिल्हाधिकारी आणि जिल्हा पोलीसअधीक्षकांना तक्रार नोंदवली.
आमदार कांबळे यांनी जिल्हा आरोग्य अधिकारी डॉ. अजय डवले यांना फोन केला. फोनवरून घाणेरड्या भाषेत शिवीगाळ केली. तसेच जीव मारण्याची धमकी दिली. “तुला चप्पलेनं मारणार, तु मला भेट आता. तुला चप्पलेनं मारला नाही, तर माझं नाव रणजित नाही. तुला जर वाटत की कलेक्टर आणि एसपी तुला वाचवणार, तर तुला पोलीस स्टेशनमध्ये मारणार, अशी शिवीगाळ केली. तसेच तालुका अधिकाऱ्यांनाही कांबळे यांनी धमकावले आहे, असं डवले यांनी तक्रारीत म्हटले आहे. याप्रकरणाची गंभीर दखल घेऊन गुन्हा दाखल करावा, अशी मागणी डॉ. डवले यांनी केली आहे. ही घटना समोर आल्यानंतर जिल्हा आरोग्य अधिकारी संवर्ग संघटनेनं संताप व्यक्त केला आहे.
दरम्यान, वैद्यकीय सेवा व्यक्ती व संस्था विरोधात हिंसक कृत्याअंतर्गत हा गुन्हा दाखल करण्यात आल्याचं पोलीस अधिकारी सत्यजित बंडेवार यांनी सांगितलं आहे. या प्रकरणात पोलीस काय कारवाई करतात हे पाहणं महत्वाचं ठरणार आहे.
