धरणगाव (प्रतिनिधी) तालुक्यातील पिंप्री खुर्द येथील दोन वर्ष वयाचा कार्तिक शशिकांत बडगुजर हा २८ जून रोजी सकाळी अंगणात खेळत असताना अचानक हृदयविकाराचा तीव्र झटका आल्याने त्याचा मृत्यू झाला. अचानक घडलेल्या या घटनेमुळे कुटुंबियांनी काळीज चिरणारा आक्रोश केला.
पिंप्री येथील शशिकांत बाबूलाल बडगुजर यांचा कार्तिक बडगुजर हा दोन वर्षाचा मुलगा आपल्या अंगणात खेळत होता. सकाळी ९ वाजेच्या सुमारास अंगणात खेळून झाल्यानंतर कार्तिक घरात आला व अचानक जमीनीवर पडला. हे पाहून कार्तिकचे आजोबा बाबूलाल बडगुजर यांनी नातवाला उचलले. परंतु तो कोणतीही हालचाल करत नव्हता. त्यामुळे त्यांनी लागलीच डॉक्टरांना बोलावले.
डॉक्टरांनी लहान बालकाला तपासून मृत घोषित केले. हृदयविकाराने त्याचे निधन झाल्याचे त्यांनी सांगितले. दरम्यान, अतिशय गोंडस व हुशार बालकाचा अचानक मृत्यू झाल्याने पालकांना मोठा मानसिक धक्का बसला. मृत कार्तिक हा दैनिक ‘दिव्य मराठी’ चे पेपर एजन्सी धारक बाबूलाल काशिनाथ बडगुजर यांचा नातू होता. दुपारी २ वाजता मृत कार्तिकवर शोकाकुल वातावरणात अंत्यसंस्कार करण्यात आले. या घटनेमुळे पिंप्री परिसरात हळहळ व्यक्त केली जात आहे.
