अमळनेर (प्रतिनिधी) पोलिसांनी सलग दुसऱ्या दिवशी देवगाव देवळी येथे धाड टाकून सुमारे ७५ हजाराची गावठी दारू नष्ट केली. तर गावठी हातभट्टी चालवणारे तिन्ही संशयित आरोपी मात्र पसार होण्यात यशस्वी झाले आहेत.
तालुक्यातील देवगाव देवळी येथे नाल्याच्या काठावर झाडाझुडुपांमध्ये काही लोक दारूची हातभट्टी चालवत असल्याची माहिती पोलीस निरीक्षक विकास देवरे यांना २१ रोजी सकाळी मिळाली होती. देवरे यांनी पोलीस उपनिरीक्षक अक्षदा इंगळे, पोलीस उपनिरीक्षक नामदेव बोरकर, मोनिका पाटील, नाना पवार, योगेश सोनवणे, उदय बोरसे यांना या दारू भट्ठयांवर छापे मारण्यासाठी रवाना केले. सकाळी ८ वाजेच्या सुमारास नाल्याच्या काठावर झुडुपात चंद्रकांत नगराज भील (वय ४०) हा प्लास्टिक ड्रममध्ये काठीने दारू ढवळताना दिसून आला. पोलिसांना पाहताच तो पळून गेला. त्याठिकाणी २५ हजार रुपयांचे गुळ व नवसागर मिश्रित ५०० लिटर कच्चे रसायन चार ड्रममध्ये आढळून आले. पोलिसांनी नमुना काढून हे सर्व रसायन नष्ट केले. त्यानंतर लगेच पोलिसांनी आणखी दोन ठिकाणी धाड टाकली. त्यांना सखाराम लालचंद भील (वय ५०) याच्या हातभट्टीवर ३० हजाराचे ६०० लिटर कच्चे रसायन, तर छगन जमाराव भील (वय ५०) याच्या हटभट्टीवर २० हजाराचे ४०० लिटर कच्चे रसायन आढळून आले. पोलिसांनी या तिन्ही हातभदूया उध्वस्त केल्या आहेत. परंतु, तिन्ही आरोपी फरार झाले आहेत. या तिन्ही गुन्ह्यांचा तपास हेडकॉन्स्टेबल गणेश पाटील, हेडकॉन्स्टेबल सुनील पाटील करत आहेत.
