छत्रपती संभाजीनगर (वृत्तसंस्था) बिडकिन पैठण तालुक्यातील शेवता पिंपळवाडी येथे कार्यरत असलेल्या एका वायरमनचा काम करतांना विजेच्या धक्याने जागीच मृत्यू झाल्याची घटना सोमवारी (दि. २८) घडली. श्रीपाद राजाराम भोंडे (३७) शॉक लागून मृत्यू झालेल्या कर्मचाऱ्याचे नाव आहे.
लोहगाव शिवारातील कदमवाडी येथे सोमवारी सकाळी ९ वाजेच्या सुमारास एक कावळा विद्युत तारेत अडकला होता. ही माहिती मिळताच श्रीपाद भोंडे हे तेथे गेले होते. कावळ्याला विद्युत तारेतून बाहेर काढत असतांना त्यांना विजेचा जोरदार धक्का बसल्याने ते गंभीरजखमी झाले. भोंडे यांना ज्युनिअर इंजिनिअर ईश्वर तावरे, नामदेव शेळके, उमर पठाण, संभाजी नाचन यांच्यासह अन्य ग्रामस्थांनी गंभीर जखमी अवस्थेत ग्रामीण रुग्णालयात बिडकीन येथे उपचारासाठी दाखल केले. वैद्यकीय अधिकारी यांनी तपासून भोंडे यांना मृत घोषित केले. या प्रकरणी बिडकीन पोलीस ठाण्यात अकस्मात मृत्यू नोंद करण्यात आली.
