चंद्रपूर (वृत्तसंस्था) चिमूर तालुक्यातील डोमा येथील एक गुराख्यास वाघाने हल्ला करून ठार केले. शुक्रवारी घडलेली ही घटना शनिवारी उघडकीस आली. या घटनेत एक बैलही ठार झाला. डोमळू रामाजी सोनवणे (६५) असे मृत गुराख्याचे नाव आहे.
डोमळू रामाजी सोनवाणे हा नेहमीप्रमाणे डोमा बिटातील कंपार्टमेंट नंबर ४७४ मध्ये जनावरे चराईसाठी जात होता. १४ जुलैलासुद्धा तो गावातील गुन्हे घेऊन जंगलात गेला होता. अचानकपणे वाघाने बैलावर हल्ला केला. यावेळी त्या बैलाला वाचविण्यासाठी गुराखी गेला असता त्यालाही वाघाने ठार केले. संध्याकाळी जनावरे घरी आलीत. परंतु गुराखी घरी न आल्यामुळे घरच्या व गावातील लोकांनी जंगलात शोधाशोध केली. परंतु रात्र होऊनही तो आढळून आला नाही.
त्यामुळे शनिवारी सकाळीच शोधाशोध केली असता डोमळू यांचा मृतदेह दिसून आला. त्या मृतदेहापासूनच काही अंतरावर बैलही मृत अवस्थेत दिसला. त्याचा काही भाग वाघाने खालेल्ला होता. याबाबतची माहिती वनविभागाला दिली देण्यात आली होती. दरम्यान, मृतकाच्या नातेवाईकांना वनविभागामार्फत तत्काळ २५ हजार रुपयांची मदत करण्यात आली.
