धरणगाव (प्रतिनिधी) तालुक्यातील पिंपळेसिम येथे एका अनोळखी ४० वर्षीय इसमाचा मृतदेह विहिरीत आढळून आल्यानंतर प्रचंड खळबळ उडाली आहे. पाण्यात फुगल्यामुळे मृतदेहाची अवस्था अत्यंत खराब झाली होती. त्यामुळे ओळख पटविणे शक्य नव्हते.
या संदर्भात अधिक असे की,दि.३ जानेवारी रोजी दुपारी ४ :३० वाजेच्या सुमारास तालुक्यातील पिंपळेसिम येथील संतोष पाटील यांच्या शेतातील विहिरीत एक मृतदेह तरंगताना आढळून आला. याबाबत लागलीच पोलीस पाटील भगवान लक्ष्मण पाटील यांना कळविण्यात आले. यानंतर घटनास्थळी धरणगाव पोलीस हजर झाले. मृतदेहाची अवस्था बघता हा इसम साधरण एक-दीड दिवसाआधी विहिरीत पडला असल्याची शक्यता वर्तविण्यात आली. मृतदेहाच्या एका पायात काळ्या रंगाचा करदोळा होता. यानंतर रात्री मृतदेह धरणगाव ग्रामीण रुग्णालयात आणण्यात आला. मृतदेहाचे शवविच्छेदन केल्यानंतर दि. ४ रोजी पालिकेच्या कर्मचाऱ्यांच्या मदतीने मृतदेहाचा दफनविधी करण्यात आला.
दरम्यान, धरणाव पोलिसांनी सोशल मिडियाच्या माध्यमातून तसेच आजू-बाजूच्या गावात स्वत: फिरून विचारपूस करण्यात आली. अगदी दंवंडी देखील देण्यात आली. मृतदेहाशी निगडीत कोणतीही माहिती असल्यास धरणगाव पोलिसांसोबत संपर्क साधण्याचे आवाहन करण्यात आले असून पुढील तपास पो.ना.दीपक पाटील हे करीत आहेत.
