यवतमाळ (वृत्तसंस्था) जेवनाच्या पंगतीतून उठवल्याचा राग मनात धरून एका तरुणावर प्राणघातक हल्ला करण्यात आल्याची धक्कादायक घटना यवतमाळ तालुक्यातील बोरीसिंह येथे शुक्रवारी घडली. या प्रकरणी वडगाव जंगल पोलिस ठाण्यात दोघांवर गुन्हे दाखल करण्यात आला आहे. तर राहुल नंदकिशोर केसलकर असे गंभीर जखमी तरूणाचे नाव आहे.
याबाबत स्थानिक माध्यमांमध्ये आलेल्या वृत्तानुसार यवतमाळ तालुक्यातील बोरीसिंह येथे एका व्यक्तीकडे लग्न होते. लग्न आटोपल्यानंतर जेवणाच्या पंगतीत प्रणय चेलपेलवार हा बसला होता. दोन-तीन पंगत उठल्यानंतरही प्रणय पंगतीतून उठायला तयार नव्हता. गावातील युवक पंगतीत वाढण्याचे काम करत होते. त्यांनी त्याला समजावून सांगितल्यानंतरही तो वाढप्यांना त्रास देत होता. शेवटी त्याला खडसावून दिनेश बहिरम आणि राहुल केसलकर या दोघांनी पंगतीबाहेर काढले.
पंगतीतून उठवल्याच्या रागातून प्रणय आणि त्याच्या एक साथीदाराने राहुल सोबत वाद घातला. वाद वाढल्यानंतर एकाने धारदार चाकूने राहुल याच्यावर वार केले. यावेळी दिनेश याने धाव घेवून त्याचा हातातील धारदार चाकू हिसकावला असता त्याच्या देखील हाताला देखील हल्लेखोराने कडाडून चावा घेऊन शिविगाळ केली. तसेच जीवे मारण्याची धमकी दिली.
दरम्यान, वाद सुरु असतांना झटापटीत हल्लेखोरापैकी एक ग्रामस्थांच्या हाती लगाला. त्याला ग्रामस्थांनी चांगलाच प्रसाद देत वडगाव जंगल पोलिसांच्या ताब्यात दिले. दिनेश बहिरम यांच्या तक्रारीवरून प्रणय कैलास चेलपेलवार (२२), रा. अंबिकानगर, यवतमाळ याच्यासह दोघांवर गुन्हा दाखल केला. दरम्यान, या घटनेत राहुल गंभीर जखमी झाला असून त्याला उपचारासाठी तत्काळ रूग्णालयात दाखल करण्यात आले.
