जळगाव (प्रतिनिधी) – जळगाव-ममुराबाद रस्त्यावर सोमवारी सायंकाळी कावड यात्रेत भरधाव आयशर ट्रक घुसून चिमुकल्याला चिरडले. यात चिमुकल्याचा जागिच मृत्यू झाल्याने संतप्त जमावाने आयशर ट्रक पेटवत आक्रमक पवित्रा घेतला. यावेळी आयशर विझवण्यासाठी आलेल्या महापालिकेच्या बंबांना देखील काही अंतराव अडविण्यात आले असून आयशर चालकाला येथे आणा तोपर्यंत गाडी विझवू देणार नाही, असा पवित्रा जमावाने घेतला.
किराणा माल घेऊन जाणाऱ्या एमएच-२०-ईजी-३५९३ क्रमांकाच्या आयशर वाहनाने कावड यात्रेत सहभागी झालेलाप्रजापती नगराजवळ १० वर्षीय प्रबल राजू गवळी या बालकाला चिरडले. यावेळी आयशर वाहनाने बालकाला काही अंतरापर्यंत फरफटत नेल्याचे प्रत्यक्षदर्शीनी सांगितले. या प्रसंगी कावड यात्रेतील भाविकांनी घटनास्थळी एकच आक्रोश केला. तसेच संतप्त जमावाने आयशर वाहन पेटवून दिले. मयत चिमुकल्याचा मृतदेह शासकीय वैद्यकीय महाविद्यालयात हलविण्यात आला होता. घटनेची माहिती मिळताच अग्निशमन दल आणि पोलिसांचे पथक घटनास्थळी दाखल झाले. परंतु संतप्त जमावाने त्यांना पेटलेल्या वाहनापर्यंत न जाऊ देता काही अंतरावर अडवून ठेवले होते. त्यानंतर जमावाची समजूत काढून पोलिसांनी घटनास्थळावर जाऊन पंचनामा केला. याप्रकरणी रात्री उशिरापर्यंत गुन्हा दाखल करण्याचे काम सुरु होते.
चालकाला ताब्यात देण्याची मागणी
दरम्यान, आयशर चालकाला मारहाण करण्यात आली असून त्याला उपचारासाठी रुग्णालयात हलविण्यात आले. मात्र, संतप्त नागरिकांनी चालकाला तातडीने घटनास्थळी आणून त्यांच्या ताब्यात देण्याची मागणी केली. परिस्थितीचे गांभीर्य लक्षात घेऊन पोलिसांनी मोठा बंदोबस्त तैनात केला असून, उशिरापर्यंत जमावाची समजूत काढण्याचे प्रयत्र सुरू होते.
पेटवलेले आयशर चोपड्याची
या अपघातात किराणा माल घेवून जाणारा आयशर चालक उबेद खान इकबाल खान पठाण वय: ३४ वर्ष राहणार चोपडा याला देखील किरकोळ दुखापत झाली असल्याचे सांगण्यात येत आहे. सदर आयशर ही चोपडा येथील भूपेंद्र नटवरलाल गुजराती यांची असल्याचे सांगण्यात येत आहे.
