पाळधी, ता. धरणगाव (प्रतिनिधी) गिरणा नदीपात्रातून अवैधरित्या वाळू उपसा करतांनाचे कोतवालाने फोटो काढले. ते फोटो तहसीलदारांना पाठविल्याचा राग आल्याने वाळूमाफियाने हवेत गोळीबार केला. ही घटना मंगळवार दि. १७ सप्टेंबर रोजी दुपारच्या सुमारास धरणगाव तालुक्यातील चांदसर गावात घडली. या घटनेमुळे पुन्हा वाळूमाफियांकडून दहशत निर्माण झाली आहे. गोळीबारानंतर वाळूमाफिया तेथून पसार झाला. याप्रकरणी पाळधी पोलिस ठाण्यात गुन्हा दाखल करण्यात आला आहे.
धरणगाव तालुक्यातील चांदसर गावालगत असलेल्या गिरणा नदीपात्रातून अवैधरित्या वाळूचा उपसा केला जात आहे. वाळू वाहतुक रोखण्यासाठी त्याठिकाणी चाऱ्या खोदून रस्ता बंद करण्यात आला असल्याने त्याठिकाणाहून अवैध वाळू उपसार होत नव्हता. अवैध वाळू उपसा करण्यासाठी चांदसर व वाकटुकी येथील काही जण चाऱ्या बुजवित असल्याची माहिती कोतवाल अमोल मालचे यांना मिळाली. ते लागलीच त्याठिकाणी जावून त्यांनी चाऱ्या बुजविणाऱ्यांना जाब विचारला. मात्र ते ऐकत नसल्याने कोतवाल अमोल मालचे यांनी त्यांचे फोटो काढून धरणगाव तहसीलदार यांना व्हॉट्स अॅपवरुन पाठविले. त्याचा राग आल्याने त्यांनी कोतवाल यांना शिवीगाळ करीत जीवेठार मारण्याची धमकी दिली.
कोतवालाला धमकी दिल्यानंतर वाळूमाफिया गोपाल कोळी (रा. वाकटुकी, ता. धरणगाव) याने त्याच्याजवळ असलेल्या पिस्तुलातून हवेत गोळीबार केला. यामुळे त्याठिकाणी असलेल्यांसह गावात देखील खळबळ माजून गेली. गोळीबार केल्यानंतर वाळूमाफिया तेथून पसार झाले.घटनेची माहिती मिळताच चोपडा भागाचे पोलीस उप विभागीय अधिकारी घोलप, पो. नि.पवन देसले यांनी भेट देऊन तपासा बाबत सूचना दिल्या. आरोपीचा शोधार्थ पोलिसांची पथके रवाना करण्यात आली आहे. या घटने मुळे येथिल वाळू उपसा पुन्हा चर्चेत आला असून आता यावर काय कारवाई होते, याकडे परिसरातील नागरीकांचे लक्ष लागले आहे.
