मुंबई (वृत्तसंस्था) मुंबई महापालिकेनं केंद्रीय मंत्री नारायण राणे (Narayan Rane) यांना त्यांच्या बंगल्यातील बांधकामाची तपासणी आणि मोजमाप करण्यासाठी नोटीस पाठवली आहे. यावरून राणे कुटुंबाकडून शिवसेनेवर जोरदार टीकास्त्र सोडले जात आहे. स्वत: नारायण राणे यांनी ट्विट करत मुख्यमंत्री उद्धव ठाकरे यांचं निवासस्थान असलेल्या ‘मातोश्री’ बंगल्यातील चौघांविरोधात ईडीची (ED) नोटीस तयार असल्याचा दावा केला आहे.
“खासदार विनायक राऊत यांच्यासाठी खास बातमी. लवकरच सुशांतसिंग आणि सामुदायिक बलात्कार करुन तिची हत्या केली त्या दिशा सालियन या दोघांचीही आत्महत्या नव्हे हत्या झाली. त्यांचीही चौकशी परत होईल. एवढेच नाही तर मातोश्रीच्या चौघांवर ईडीची नोटीस तयार असल्याचे कळाले. विनायक राऊत हे घडल्यावर आपले बॉस आणि आपण कुठे धावणार?”, असा खोचक सवाल नारायण राणे यांनी ट्विटरवर केला आहे.
नारायण राणे यांनी दोन दिवसांपूर्वी पत्रकार परिषद घेऊन शिवसेनेते नेते संजय राऊत यांनी घेतलेल्या पत्रकार परिषदेला प्रत्युत्तर दिलं होतं. त्यावेळी त्यांनी संजय राऊतांवर सडकून टीका केली होती. राणे यांच्या पत्रकार परिषदेनंतर शिवसेनेकडून विनायक राऊत यांनी पत्रकार परिषद घेतली होती. त्यावेळी त्यांनी नारायण राणे यांचे जुने भाषणाचे व्हिडीओ लावत पंतप्रधान नरेंद्र मोदींवर टीका करतानाचे व्हिडीओ प्रसारमाध्यांसमोर दाखवले होते. आता त्याचाच बदला नारायण राणे घेणार असल्याची चर्चा आहे. नारायण राणे मुंबईच्या दिशेला रवाना झाले आहेत. ते मुंबईत आल्यावर पत्रकार परिषद घेतील, अशी माहिती सूत्रांनी दिली आहे. या पत्रकार परिषदेत ते कोणाच्या विरोधात ईडीची नोटीस तयार झालीय, याचा खुलासा करतात का ते पाहणं महत्त्वाचं ठरणार आहे.
सूत्रांनी दिलेल्या माहितीनुसार, नारायण राणे आता मुंबईच्या दिशेला रवाना झाले आहेत. ते या ट्विट संदर्भात उद्या सकाळी अकरा वाजता पत्रकार परिषद घेऊन खुलासा करणार आहेत. नारायण राणे यांच्या मुंबईतील निवासस्थानी ही पत्रकार परिषद होणार आहे.
