नाशिक (वृत्तसंस्था) एकतर्फी प्रेमातून एका तरुणाने त्याच्या साथीदारासह तब्बल सात वाहने पेटवून दिल्याची खळबळजनक घटना नाशिकच्या काठे गल्ली परिसरात घडली आहे.
फिर्यादी तरुणी आणि संशयित सुमित पगारे यांची ओळख आहे. संशयित पगारे याने फिर्यादी तरुणीला सातत्याने विवाह करण्याचा तगादा लावला. परंतु, तरुणीने त्यास नकार दिल्याने संशयित पगारे याने रागाच्या भरात सहकारी संशयित विकी जावरे रा. काठेगल्ली) याच्या मदतीने तरुणीच्या दुचाकीसह अन्य दुचाकी, चारचाकी वाहनांची आणि रिक्षाची जाळपोळ केली.
घटना लक्षात येताच स्थानिक रहिवाशांनी तातडीने पाण्याचा मारा करीत आग शमविण्याचा प्रयत्न केला. मात्र तोपर्यंत बहुतांशी वाहने जळून राख झाली होती. या घटनेने परिसरात दहशतीचे वातावरण निर्माण झाले होते. या प्रकरणी भद्रकाली पोलीस ठाण्यात गुन्हा दाखल करण्यात आला असून पोलिसांनी दोन्ही संशयितांना अटक केली आहे.
