बीड (वृत्तसंस्था) भरधाव वेगात निघालेल्या ट्रकने मोटारसायकलला दिलेल्या जोरदार धडकेत एका सैनिकासह तरुण ठार झाल्याची दुर्दैवी घटना बुधवार दि १५ नोव्हेंबर रोजी रात्री नऊ वाजण्याच्या दरम्यान मांजरसुंबा येथे घडली. सतीश मारुती जगताप (वय २५ वर्षे, रा. कर्झणी) व नाना जोगदंड (वय २७ वर्षे, रा. गोगलवाडी), असे मयतांची नावे आहेत.
सतीश मारुती जगताप व नाना राम जोगदंड हे दोघे जण रात्री गोगलवाडीहून बीडकडे मोटारसायकलवर येत होते. मांजरसुंब्याजवळ त्यांच्या मोटारसायकलला ट्रक (क्र. एम एच. २३ – ३४१६) ने जोराची धडक दिली. या अपघातात सतीश मारुती जगताप व नाना जोगदंड हे ठार झाले. नाना जोगदंड हे आसाम राज्यात सैनिक म्हणून कार्यरत होते.
दिवाळीच्या सुट्ट्यानिमित्त ते गावाकडे आले होते. काही कामानिमित्त ते आणि सतीश जगताप हे दोघे बीडला येत असताना अपघात होऊन दोघेही गतप्राण झाले. या घटनेने मांजरसुंबा परिसरात हळहळ व्यक्त करण्यात येत आहे. या प्रकरणी नेकनूर पोलिसांनी घटनास्थळी जावून पंचनामा केला. ट्रक चालकाविरोधात गुन्हा दाखल करण्यात आला आहे.
