मुंबई (वृत्तसंस्था) नॅशनल हेराल्ड प्रकरणी ईडीकडे आज सोनिया गांधी यांना विचारण्यासाठी कोणतेच प्रश्न नव्हते. सोनियांनी चौकशी पुढे ढकलण्यासाठी कोणतंच निवेदन दिलेलं नाही, समाजमाध्यमांमध्ये याबाबतच्या अफवा पसरवल्यात जात आहेत, असं काँग्रेसचे ज्येष्ठ नेते जयराम रमेश यांनी सांगितलं. एवढेच नव्हे तर जे काही प्रश्न विचारायचे असतील ते विचारा मी रात्री ८-९ वाजले तरी चालतील मी तयार आहे असं ईडीच्या अधिकाऱ्यांना सोनिया गांधी यांनी सांगितल्याची माहितीही त्यांनी दिली.
सक्तवसुली संचालनालयाकडून (ईडी) आज (२१ जुलै) काँग्रेस पक्षाच्या हंगामी अध्यक्षा सोनिया गांधी यांची चौकशी होत आहे. याविरोधात काँग्रेस पक्ष आक्रमक झाला आहे. ईडीची कारवाई राजकीय सुडबुद्धीने केली जात असल्याचा आरोप करत काँग्रेसच्या कार्यकर्त्यांनी देशभरात विविध ठिकाणी आंदोलनं केली आहेत. काँग्रेसने मुंबईत ईडी कार्यालयासमोरही आंदोलन केले. यावेळी पोलिसांनी मुंबई काँग्रेस अध्यक्ष व आमदार भाई जगताप यांना ताब्यात घेतले.
सोनिया गांधींकडून ईडीला तब्येतीचं कारण देत चौकशी पुढे ढकलण्यासाठी आणि लवकर संपवण्यासाठीचं निवेदन केलं. ते ईडीनं स्वीकारलं असं वृत्त प्रसारित केलं जात होतं. त्यावर काँग्रेस नेते जयराम रमेश यांनी एका व्हिडिओच्या माध्यमातून स्पष्टीकरण दिलं आहे. ईडीनं म्हटलं की आमच्याकडे कोणतेच प्रश्न नाहीत. तुम्ही जाऊ शकता असं सांगितलं. पण सोनियांनी स्वत: तुम्हाला मला जे काही प्रश्न विचारायचे असतील ते विचारा मी रात्री ८-९ वाजले तरी चालतील मी तयार आहे असं म्हटलं. चौकशी संपवण्यासाठी सोनियांनी कोणत्याही प्रकारचं निवदेन ईडीला दिलेलं नाही हे मी स्पष्ट शब्दांत सांगू इच्छितो. ईडीच्या सुत्रांकडून चालवल्या जाणाऱ्या या संदर्भातील बातम्यांमध्ये कोणतंही तथ्य नाही”, असं जयराम रमेश म्हणाले.
