जळगाव (प्रतिनिधी) गणपती विसर्जनाच्या दिवशी महापौर जयश्री महाजन यांच्या घरावर हल्ला केल्याप्रकरणी पोलिसांनी 43 जणांविरुद्ध गुन्हा दाखल केला आहे. पुर्वेश यशवंत महाजन (वय 23, रा. विठ्ठल मंदिर चौक) यांनी याबाबत फिर्याद दिली आहे.
गणपती विसर्जनाच्या दिवशी एका मंडळाच्या कार्यकर्त्यांनी थेट महापौर जयश्री महाजन यांच्या घरावर फटाके, गुलाल फेकला. त्यामुळे काही तरुणांनी त्यांना मज्जाव केला. याचा राग आल्यामुळे जमावाने थेट दगडफेक सुरू केली. यावेळी झालेल्या तुफान दगडफेकीत तीन जण जखमी झाले होते. महिलांवर चाकुने वार करण्याचाही प्रयत्न जमावाने केला. विसर्जनाच्या दिवशी रात्री साडेदहा वाजता ही घटना घडली आहे. या प्रकरणी सोमवारी सकाळी जमावाच्या विरुद्ध प्राणघातक हल्ल्याचा गुन्हा दाखल करण्यात आला आहे.
काय म्हटलंय फिर्यादीत !
महाजन यांनी दिलेल्या फिर्यादीनुसार, त्यांच्या जयदुर्गा भवानी क्रिडा मंडळाचे कार्यकर्ते गणपती विसर्जन करून विठ्ठल मंदिर चौकात थांबले होते. याच चौकात महापौर महाजन यांचे घर आहे. दरम्यान, यावेळी एक गाव एक गणपती व श्रीराम मित्र मंडळ असे दोन्ही मंडळ त्या मार्गावरून विसर्जन मिरवणूक नेत होते. या मिरवणूकीतील काही तरुण महापौर महाजन यांच्या घरावर गुलाल फेकून मोठ्याने आरडाओरड करीत होते. एक तरुण पेटलेले फटाके महाजन यांच्या घरावर फेकत होता. या प्रकरामुळे चौकात प्रचंड गोंधळ निर्माण झाला. त्यामुळे पुर्वेश महाजन यांच्यासह महेश महाजन, पुष्पक महाजन यांनी गोंधळ घालणाऱ्या तरुणांना हटकले.
यांच्याविरुद्ध दाखल झालाय गुन्हा
आमच्या घरात वृद्ध पेशंट आहे. त्यांचे बायपास झाले आहे. त्यामुळे तुम्ही या चौकातून पुढे जा. असे महाजन यांनी जमावाला सांगितले. याचा राग आल्यामुळे योगेश राजेंद्र नाईक, तेजस ज्ञानेश्वर वाघ, अजय संतोष सांगळे, मयुर बाळकृष्ण सांगळे, दिनेश शिवदास घुगे, किरण उर्फ उली जगदीश नाईक, तेजस उर्फ लंगड्या सुनिल घुगे, महेश शिवदास घुगे, दीपक राजेंद्र नाईक, राहुल विठ्ठल सानप, वैभव किशोर वाघ, महेश उर्फ माही लाड, रामा वासुदेव सानप, मंगेश राजेंद्र नाईक, भावेश उमेश घुगे, भरत चांगदेव आंधळे, किरण शैले, सागर विजय लाड व सोबत असलेल्या 25-30 जणांनी तुफान दगडफेक सुरू केली. काही जणांनी महिलांच्या अंगावर चाकू रोखून वार करण्याचे प्रयत्न केले.
चाकी, चारचाकींचे नुकसान, सोनसाखळी देखील लंपास
यादरम्यान अॅड. निता भरत महाजन यांच्या गळ्यातील तीन तोळ्याची सोनसाखळी ओढून लंपास केली. दुचाकी, चारचाकींचे नुकसान केले. यानंतर गणेश मूर्ती रस्त्यावरच सोडून पळून गेले. या प्रकारामुळे प्रचंड तणाव निर्माण झाला होता. पोलिस अधिकाऱ्यांनी घटनास्थळी भेट देत जमाव पांगवला. या प्रकरणी शनिवारी एमआयडीसी पोलिस ठाण्यात गुन्हा दाखल करण्यात आला.
