जळगाव प्रतिनिधी : पाचशे रुपये न दिल्याच्या राग आल्याने नितीन नाना काळे (वय ३५, रा. जैनाबाद, घरकुल चौक) या तरुणावर धारदार शस्त्राने वार करण्यात आले. या जीवघेण्या हल्ल्यात तरुणाच्या पोटातील आतडे बाहेर निघाले. त्याच्यावर उपचार सुरू असून संशयित श्याम तुकाराम सूर्यवंशी याला शनिपेठ पोलिसांनी ताब्यात घेतले. ही घटना रविवारी दुपारच्या सुमारास जैनाबाद परिसरात घडली.
जखमी नितीन काळे याच्या वडिलांनी दिलेल्या माहितीनुसार, नितीन हा गोवा येथे कामाला असून दोन दिवसांपूर्वीच तो मित्राच्या साखरपुड्याच्या कार्यक्रमासाठी तो घरी आला होता. रविवारी तो घरी असताना श्याम सूर्यवंशी हा तेथे आला व नितीनला घेऊन त्याच्या घरी गेला. त्यानंतर त्याच्यावर धारदार शस्त्राने वार करीत त्याला घराबाहेर आणून टाकले. याठिकाणी नितीन हा रक्ताच्या थारोळ्यात पडलेला होता.
पोलिसांनी केले रुग्णालयात दाखल
घटनास्थळी पोलिस निरीक्षक कावेरी कमलाकर, अमोल वंजारी, निलेश घुगे, पराग दुसाने हे घटनास्थळी दाखल झाले. त्यांनी रक्ताच्या थारोळ्यात पडलेल्या नितीनला तात्काळ रिक्षातून शासकीय वैद्यकीय महाविद्यालय व रुग्णालयात दाखल केले असून याठिकाणी त्याच्यावर उपचार सुरु आहेत.
यापुर्वीही केली होती मारहाण
धारदार चाकूने वार केल्यानंतर शनिपेठ पोलिसांनी संशयित श्याम सूर्यवंशी याला ताब्यात घेतले. पाचशे रुपये न दिल्याने त्याने तरुणावर वार केल्याची माहिती पोलिस तपासात समोर येत आहे. या पूर्वी श्याम सूर्यवंशी याने काचेची बाटली फोडून नितीन काळे याच्यावर वार केले होते. त्यानंतर आता पुन्हा त्याने धारदार चाकूने नितीनवर वार करीत गंभीर जखमी केल्यामुळे परिसरात खळबळ माजन गेली होती.
