धरणगाव (प्रतिनिधी) येथील कमला नगर भागातील एका घरात २१ वर्षीय तरुणीला दोरीने बांधून चोरी करण्याचा प्रयत्न केल्याची घटना उघडकीस आली आहे. याप्रकरणी धरणगाव पोलीस स्थानकात दोन अनोळखी इसमांविरुद्ध गुन्हा दाखल करण्यात आला आहे.
यासंदर्भात शुभांगी विश्वास सावंत (वय २१ रा. चमगाव ता. धरणगाव ह.मु. कमल नगर धरणगाव) हिने दिलेल्या फिर्यादीनुसार, दि. ५ जून २०२२ रोजी दुपारी २ वाजेच्या सुमारास शुभांगी ही घरी एकटी असतांना कोणीतरी अज्ञात दोन इसम तोंडास कापड बांधलेले चोरीच्या उद्देशाने घरात घुसले. यावेळी शुभांगीच्या डोक्यावर झाडूने मारुन रुमाल नाका तोडांस लावून एक फडक्याचा बोळा शुभांगीच्या तोंडात खुपसला. तसेच घरातील दोरीने शुभांगीचे दोन्ही हात बांधले. त्यानंतर बेडरुममध्ये जाऊन लाकडी कपाट खोलून शोधाशोध करुन पहिले असता दोघांना काही एक न मिळून आले नाही. त्यामुळे चोरट्यांनी शुभांगी हिस सांग पैसे कोठे ठेवले आहेत ? सोन कुठे ठेवले आहे? म्हातारी तर खुप सोनं घालते ? लॉकरची चावी कुठे आहे?, असे विचारत होते. तेव्हाच रस्त्याने जाणाऱ्या वाहनाचा आवाज आला तसेच शुभांगीच्या मोबाईलमधे सायरन सारखे वाजल्याने दोन्ही इसम घाबरुन घरातून पळून गेले. याप्रकरणी धरणगाव पोलीस स्थानकात दोन अनोळखी इसमांविरुद्ध गुन्हा दाखल करण्यात आला आहे. तसेच पुढील तपास पो.ना. उमेश पाटील हे करीत आहेत. दरम्यान पोलिसांनी या घटनेचा सर्व बाजूने तपास करायला सुरुवात केली आहे.
