अमळनेर (प्रतिनिधी) बनावट नंबरच्या कारमधून दरोड्याच्या उद्देशाने जाणाऱ्या मालेगावच्या चारजणांच्या मुसक्या पोलिसांनी अटक केली आहे. त्यांच्याकडून कारसह सुन्या, चाकू, टॉमी जप्त करण्यात आले आहेत. अमळनेर शहरातील अमळनेर ते चोपडा रस्त्यावरील गजानन महाराज मंदिरासमोर रस्त्यावर ११ रोजी रात्री ३.३० वाजण्याच्या सुमारास ही कारवाई करण्यात आली. (Amalner Crime News)
जाणून घ्या….नेमकं काय घडलं ?
या संदर्भात अधिक असे की, अमळनेर पोलीस स्थानकात (Amalner Police) कार्यरत असलेले सहाय्यक फौजदार बापू साळुंखे व चंद्रकांत पाटील रात्री गस्त घालत हाेते. या वेळी अमळनेर ते चोपडा रस्त्यावर इंडिगो (एमएच- १९, एव्ही- ५३६२) या चारचाकीला दुचाकीची बनावट नंबरप्लेट लावून चालकासह एकूण चार व्यक्ती जात हाेते. संशय आल्याने बापू साळुंखे यांनी कार थांबवून चालकाची चाैकशी केली असता त्याने साहील शेख सुलेमान (वय २२, रा. मालेगाव, विजयनगर, कुसुंबा रोड) अशी ओळख सांगितली. तर त्याच्यासोबत मालेगाव येथील खालीद शहा मेहमूद शहा (वय २१, रा. रमजानपुरा), इसरार खान जमशेर खान (वय २३, रा. निहालनगर) व फिरोज शेख मुसा (वय २४, रा. साहिल नगर) हे गाडीत होते. त्यांना विचारल्यानंतर त्यांनी आपण जळगाव जात असल्याचे सांगितले.
…म्हणून आला पोलिसांना संशय !
संशयित चोपडा रस्त्याने जात असल्याने हे जळगाव का सांगताय ?, यामुळे पाेलिसांचा संशय बळावला. त्यामुळे बापू साळुंखे यांनी कारची पाहणी केली असता कारच्या पुढील बाजूस नंबर प्लेट नव्हती. परंतु, मागील बाजूस एमएच- १९, एव्ही- ५३६२ या क्रमांकाची नंबर प्लेट होती. मोबाइलवरील वाहन अॅप्सवर हा क्रमांक टाकून खात्री केली असता ताे नंबर दुचाकीचा असल्याचे स्पष्ट झाले.
कारमध्ये सापडले टॉमी, धारदार चाकू आणि दोरखंड !
कारची तपासणी केली असता डिकी उघडून पाहता त्यात चाकाच्या खाली एमएच१५/ बीएक्स ०४७५ हा नंबर असलेल्या चार नंबरप्लेट मिळून आल्या. तसेच हूक असलेली लोखंडाची टॉमी व दुसरी सरळ किंचित वाकलेली लोखंडी टॉमी अशा सुमारे २ फूट लांबीच्या टॉम्या मिळून आल्या. कारच्या मागील सीटच्या खाली करड्या रंगाच्या हातरुमालात गुंडाळलेला एक धारदार चाकू, एक सुती पांढया रंगाचा दोरखंड व वेगवेगळ्या आकाराच्या मोटारसायकल व कारच्या चाव्यांचे दोन जुड़गे असे मिळून आले. हे साहित्य जप्त करून ताब्यात घेण्यात आले आहे.
