धरणगाव (प्रतिनिधी) तालुक्यातील बांभोरी येथील एका ५ वर्षाच्या मुलीवर लैंगिक अत्याचाराचा प्रयत्न केल्याप्रकरणी एका विरुद्ध गुन्हा दाखल करण्यात आला आहे. तर धरणगाव पोलिसांचे एक पथक आरोपीच्या शोधार्थ रवाना करण्यात आले आहे.
पीडित मुलीच्या आईने दिलेल्या फिर्यादीत म्हटले आहे की, आम्ही नवरा-बायको शेतमजुरी करण्यासाठी जात असतो. आमची मुलगी ही घराजवळ असलेल्या लहान मुलांसोबत खेळते. ९ ऑक्टोबर रोजी सकाळी आठ वाजेच्या सुमारास आम्ही नेहमीप्रमाणे शेतात कामासाठी निघून गेलो. त्यावेळेस माझी मुलगी ही घरीच होती. दुपारी दोन वाजेच्या सुमारास मी घरी आले तर माझे पती शेतातच काम करत होते.
त्यावेळेस मी बघितले की, माझी मुलगी घराकडे येत होती व त्यावेळी आरोपी टेरू जमादार बारेला (वय २४, रा.मध्यप्रदेश, ह.मू. बांभोरी) हा मुलीला सांगत होता की, तुला दहा रुपये देतो, कोणाला काहीही सांगू नको. त्यावर मी त्याला विचारले की, तू मला माझ्या मुलीला दहा रुपये का देत आहे? त्यावर त्याने तिथून लागलीच पळ काढला. मुलीला विश्वासात घेऊन विचारले असता तिने सांगितले की, टेरू मामा माझे कपडे काढत होता व मला जवळ घेत होता, म्हणून मी रडत होती. याबाबत सायंकाळी पती घरी आल्यानंतर मी त्यांना सर्व हकीकत सांगितली. त्यानंतर सायंकाळी याबाबत विचारणा केली असता तो त्याची मोटर सायकल पुन्हा सोडून पळून गेला. याप्रकरणी आरोपी विरुद्ध भादवि कलम ३७६ व पोस्को प्रमाणे गुन्हा दाखल करण्यात आला आहे. तर त्याच्या शोधार्थ पथकं रवाना करण्यात आली आहे.
