सिडनी (वृत्तसंस्था) भारत आणि ऑस्ट्रेलिया यांच्यातील तिसऱ्या कसोटी सामन्याला गुरुवारपासून सुरूवात झाली. या सामन्यात क्लेयर पोलोसाक या महिलने एक विक्रम केला आहे. पुरुषांच्या कसोटी सामन्यात अम्पायर म्हणून काम करणाऱ्या त्या पहिल्या महिला सामना अधिकारी ठरल्या आहेत. ज्या पुरुषांच्या कसोटी सामन्यात अम्पायरिंग करणार आहेत. या सामन्यात क्लेयर पोलोसाक या चौथ्या अम्पायरची भूमिका निभावणार आहेत.
ऑस्ट्रेलियाच्या न्यू साउथ वेल्सच्या ३२ वर्षीय पोलोसाक या तिसऱ्या कसोटी सामन्यात चौथ्या पंच म्हणून काम करणार आहेत. याआधी पुरुषांच्या वनडे क्रिकेटमध्ये अंपायरची भूमिका बजावणाऱ्या पहिल्या महिला ठरल्या होत्या. त्यांनी २०१९ साली नामिबिया आणि ओमान यांच्यातील दोन लढतीत अंपायर म्हणून काम पाहिले होते. भारत आणि ऑस्ट्रेलिया यांच्यातील तिसऱ्या लढतीत मैदानावरील अंपायर म्हणून पॉल रिफेल आणि पॉल विल्सन हे काम पाहणार आहेत. तर ब्रूस ऑक्सेनफोर्ड हे तिसरे अंपायर असतील. डेव्हिड बून हे सामनाअधिकारी आहेत. कसोटी सामन्यासाठी आयसीसीच्या नियमानुसार यजमान देश चौथा अंपायर म्हणून आपल्याच देशातील आयसीसीच्या अंपायरची नियुक्ती करू शकते. पोलोसाक यांनी ऑस्ट्रेलियामध्ये २०१७ साली देशांतर्गत पुरुषांच्या लिस्ट ए सामन्यात अंपायर म्हणून काम केले होते. तेव्हा देखील पुरुषांच्या सामन्यात अंपायर म्हणून काम करणाऱ्या त्या पहिल्या महिला ठरल्या होत्या.
चौथ्या अम्पायरचं काम
मैदानात नवा चेंडू घेऊन येणं, अम्पायर्ससाठी ड्रिंक्स घेऊन जाणं, टी आणि लंच ब्रेक दरम्यान पिचची देखरेख करणं यांसारखी काम चौथ्या अम्पायरच्या देखरेखीखाली करण्यात येतात. अशातच जर कोणत्याही कारणामुळे फिल्ड अम्पायर मैदानात उपस्थित नसतील तर त्यावेळी तिसऱ्या अम्पायरला मैदानावर अम्पायरिंगसाठी जावं लागतं. अशातच चौथा अम्पायर, तिसऱ्या अम्पायरची भूमिका साकारताना दिसून येतो.
सिडनीमध्ये भारत विरुद्ध ऑस्ट्रेलिया तिसरा कसोटी सामना
दरम्यान, भारत आणि ऑस्ट्रेलियामध्ये बॉर्डर-गावस्कर ट्रॉफीचा आज तिसरा कसोटी सामना सिडनीमध्ये खेळवण्यात येणार आहे. चार सामन्यांच्या कसोटी मालिकेच्या गुणतालिकेत सध्या दोन्ही संघ १-१ अशा बरोबरीच्या गुणांवर आहेत. या सामन्यासाठी दोन्ही संघांमध्ये २-२ असा बदल करण्यात आला आहे. टीम इंडियाचा स्टार फलंदाज रोहित शर्माची संघात वापसी झाली आहे. तर याव्यतिरिक्त नवदीप सैनी आपला डेब्यू सामना खेळणार आहे. त्याचसोबत या सामन्यात ऑस्ट्रेलियाच्या संघात डेव्हिड वॉर्नर आणि विल पुकोवस्की यां दोघांचा समावेश केला आहे.
