धरणगाव (प्रतिनिधी) १ जानेवारी २०२१ रोजी संपन्न झालेल्या “पर्यावरण जनजागृती सायकल रॅलीमध्ये” गावातील विविध शाळांनी सहभाग नोंदवला होता. धरणगाव येथील गुड शेपर्ड स्कुल मधील इयत्ता १० वीच्या विद्यार्थांनी देखील या पर्यावरण जनजागृती रॅलीत सहभाग घेतला होता, या सर्व सहभागी विद्यार्थ्यांना सन्मानपत्र देऊन गौरविण्यात आले.
याबाबत सविस्तर माहिती अशी की, दि.१ जानेवारी २०२१ रोजी धरणगाव नगरपरिषद व विकल्प ऑर्गनायझेशन यांच्या संयुक्त विद्यमाने आयोजित ‘माझी वसुंधरा अभियान’ अंतर्गत “पर्यावरण जनजागृती सायकल रॅलीचे” आयोजन करण्यात आले होते. या रॅलीच्या माध्यमातून पर्यावरण वाचवा, सृष्टी वाचवा असा सकारात्मक संदेश देण्यात आला. पर्यावरण जनजागृती रॅलीत गावातील सर्व प्रमुख शाळांनी सहभाग नोंदवला होता. यामध्ये गुड शेपर्ड स्कुल धरणगाव येथील इयत्ता १० वीच्या विद्यार्थांनी देखील सहभाग नोंदवला होता. आज गुड शेपर्ड स्कुलमध्ये छोटेखानी कार्यक्रम घेऊन सहभागी विद्यार्थ्यांना सन्मानपत्र वितरित करण्यात आले. याप्रसंगी शाळेच्या प्राचार्य चैताली रावतोळे, शाखा व्यवस्थापक जगन गावित व सहशिक्षक लक्ष्मण पाटील यांच्या हस्ते सन्मानपत्र वितरित करण्यात आले. कार्यक्रमाचे प्रास्ताविक व सूत्रसंचालन क्रीडाशिक्षक अमोल सोनार यांनी केले.
