भडगाव (प्रतिनिधी) तालुक्यातील शिवणी येथे शनिवारी सकाळी पिता-पुत्राचा संशयास्पद मृत्यू झाल्याची खळबळजनक घटना २७ जुलै रोजी घडली होती. याप्रकरणी आता धक्कादायक माहिती समोर आली आहे. जन्मदात्या बापानेच १२ वर्षीय मुलाचा गळा आवळून खून करून नंतर स्वतःही गळफास आत्महत्या केली होती. संजय साहेबराव चव्हाण (४८) आणि कौशिक संजय चव्हाण (१२) अशी मृत पिता-पुत्राची नावे आहेत.
या संदर्भात अधिक असे की, २७ जुलै शनिवारी सकाळी संजय चव्हाण हे निंबाच्या झाडाला गळफास घेतलेल्या अवस्थेत तर जवळच असलेल्या पत्र्याच्या शेडमध्ये त्यांचा मुलगा कौशिक हा बंगळीवर मृतावस्थेत आढळून आला होता. हा प्रकार कळताच ग्रामस्थ व नातेवाइकांनी त्यांना भडगाव ग्रामीण रुग्णालयात आणले. वैद्यकीय अधिकाऱ्यांनी पिता- पुत्रांना मृत घोषित केले. याबाबत भडगाव पोलिसात अकस्मात मृत्यूची नोंद करण्यात आली होती.
या प्रकरणी आता पोलीस चौकशीत साक्षिदार यांच्या जबावावरून धक्कादायक माहिती समोर आली आहे. कौशिक हा घरातून पैसे घेत असल्याने व सारखा सारखा माघारी बोलत असल्याने त्याचा राग वडील संजय यांना आला होता. त्यामुळे संजय यांनी कौशिक याचा गळा दाबून जिवे ठार मारले. यानंतर स्वतः देखील झाडाला गळफास घेवून आत्महत्या केली. या प्रकरणी सपोनि चंद्रसेन पालकर यांच्या फिर्यादीवरून आता मयत बापाविरुद्ध खुनाचा गुन्हा दाखल करण्यात आला असून पुढील तपास पीएसआय शेखर डोमाळे हे करीत आहेत.
