भुसावळ (प्रतिनिधी) येथील उड्डाणपुलावर भरधाव डंपरने दुचाकीला धडक दिली. या अपघातात वृद्धेचा जागीच मृत्यू झाला तर वृद्धेसोबतचा जावई जखमी झाल्याची घटना घडली. याप्रकरणी शहर पोलीस ठाण्यात अज्ञात ट्रक चालकाविरोधात गुन्हा दाखल करण्यात आला आहे.
यासंदर्भात अधिक असे की, सरस्वतीबाई मुरलीधर वाघोदे (७५, जामनेर रोड, दत्त धाम, भुसावळ) असे अपघातात मयत झालेल्या वृद्धेचे नाव आहे. मयत सरस्वतीबाई वाघोदे या गत आठवड्यात भादली येथे त्यांच्या मुलीकडे गेल्या होत्या. मुलीच्या मुलाच्या हाताचे ऑपरेशन औरंगाबाद येथे असल्याने त्यांची मुलगी औरंगाबाद येथे गेल्याने सरस्वतीबाई भादलीत मुलीकडे थांबून होत्या. मंगळवार, २६ रोजी सकाळी त्या जावई सुरेश भोळे यांच्यासोबत भुसावळात दुचाकी (एम.एच.19 बी.यु.5997) ने येत असता महामार्गावरील उड्डाणपुलावर दुचाकीला अज्ञात ट्रक चालकाने पाठीमागून धडक दिल्याने सरस्वतीबाई या रोडवर पडल्या व त्यांच्या अंगावर ट्रकची चाके गेल्याने जागीच त्यांचा मृत्यू झाला तर सुरेश भोळे हे देखील जखमी झाले.
दरम्यान, शहर पोलिसांनी अपघात प्रकरणी अज्ञात वाहन चालकाविरोधात सुरेश भोळे यांच्या फिर्यादीनुसार गुन्हा दाखल करण्यात आला आहे. पुढील तपास पोलीस निरीक्षक प्रताप इंगळे यांच्या मार्गदर्शनाखाली सुरू आहे.
