टोकयो (वृत्तसंस्था) टेबल टेनिसपटू भाविनाबेन पटेलने टोकयो पॅरालिम्पिक स्पर्धेत भारतासाठी पहिले पदक आणले आहे. राष्ट्रीय क्रीडा दिनानिमित्त भाविनाने संपूर्ण भारताला ही भेट दिली आहे. भाविनाचा फायनलमध्ये ३-० नं पराभव झाला. तिचा वर्ल्ड नंबर वन पॅडलर झाऊ यिंगनं ११-७, ११- ५, ११-६ असा पराभव केला.
भाविना पटेलनं पॅरालिम्पिक स्पर्धेच्या इतिहासात सिल्व्हर मेडल पटकावणारी दुसरी भारतीय खेळाडू आहे. यापूर्वी २०१६ साली दीपा मलिकनं ही कामगिरी केली होती. तिनं गोळाफेक स्पर्धेत ४.६१ मीटर थ्रो करत सिल्व्हर मेडल पटकावले होते. यापूर्वी भाविना पटेलनं सेमी फायनलमध्ये चीनच्या वर्ल्ड नंबर ३ खेळाडूला पराभूत करत फायनलमध्ये प्रवेश केला होता. भाविनानं सेमी फायनलची लढत ७-११, ११-७, ११-४, ९-११ आणि ११-८ या फरकानं जिंकली होती.
गुजरातमधल्या मेहसाणा जिल्ह्यातलं वडनगर हे भाविनाचं गाव. ६ नोव्हेंबर १९८६ रोजी तिचा एका मध्यमवर्गीय कुटुंबात जन्म झाला. ती अवघ्या एका वर्षाची असताना तिला पोलिओ झाला. तेव्हापासून तिला अपंगत्व आलं. पाच जणांच्या कुटुंबात तिचे वडील एकटेच कमावणारे होते. त्यामुळे तिच्यावर इलाज करण्यासाठी पुरेसे पैसे त्यांच्याकडे नव्हते. नंतरच्या काळात तिच्यावर विशाखापट्टणममध्ये सर्जरी करण्यात आली, मात्र तिचं व्हीलचेअरवर बसणं चुकलं नाही. तरीही तिने जिद्दीने सगळ्या अडचणींवर मात करत इथपर्यंतची वाटचाल केली आहे.
