नागपूर (वृत्तसंस्था) क्षुल्लक कारणावरून वाद झाल्यानंतर त्याच्या डोक्यावर कुदळीने वार करून भोंदूबाबाने एका गुराख्याचा खून केल्याची खळबळजनक घटना घडली आहे. स्थानिक गुन्हे शाखेच्या पथकाने मोठ्या शिताफीने भोंदूबाबाला नागपुरातून अटक केली आहे. दिगंबर इस्तारी मेश्राम (महाराज) (मांडवी, जि.भंडारा), असे आरोपी भोंदूबाबाचे नाव आहे.
दि. २९ ऑगस्टला फिर्यादी श्रीराम गोपाळराव चंडीमेश्राम (५२) याचा भाऊ बबन गोपाळराव चंडीमेश्राम हा बकऱ्या चारण्यासाठी आसोली शिवारात गेला होता. दरम्यान, भगवे कपडे घातलेल्या व्यक्तीसोबतच त्याचा क्षुल्लक कारणावरून वाद झाला. त्यानंतर बबन गोपाळराव चंडीमेश्राम हा आसोली येथील टाटा जायका मोटर्स परिसरातील चहाटपरीलगत उभा असता आरोपी भोंदूबाबाने कुदळीच्या दांड्याने डोक्यावर वार करून जखमी केले.
याप्रकरणी मौदा पोलीस ठाण्यात भादंविच्या कलम ३०७, ३०२ अन्वये गुन्ह्याची नोंद करण्यात आली. या गुन्ह्याचा समांतर तपास स्थानिक गुन्हे शाखेचे पथक करीत असताना गुन्ह्यातील आरोपी घटनेनंतर नागपूरच्या दिशेने गेल्याची माहिती मिळाली. पोलिसांनी घटनास्थळापासून ते नागपूर परिसरातील सीसीटीव्ही कॅमेऱ्यांचे फुटेज तपासण्यात आले.
दरम्यान, खबऱ्यांनी संबंधित भोंदूबाबा नागपुरातील रेशीमबागेकडे दिसून आल्याची माहिती दिली. त्यावरून गुन्हे शाखेचे पथक रेशीमबाग परिसरात शोध घेत असताना तो सम्राट अशोक चौकाकडे जाताना दिसून आला. त्याचा पाठलाग करून शिताफीने ताब्यात घेतले. गुन्ह्याबाबत विचारपूस केली असता त्याने सुरुवातीला उडवाउडवीची उत्तरे दिली. मनोविकृत असल्याचे भासविण्याचा प्रयत्न केला. पोलिसांनी प्रेमाने विश्वासात घेऊन विचारपूस केली असता त्याने गुन्ह्याची कबुली दिली.
