जळगाव (प्रतिनिधी) बीएचआरमधील आमच्या हक्काचे पैसे भेटतील याची आशा आम्ही सोडून दिली होती. कारण पैशाअभावी पत्नीच्या पाठीच्या मणक्याचे ऑपरेशन न झाल्यामुळे पायाला अपंगत्व आले. परंतु तुम्ही केलेल्या कारवाईमुळे पैसे परत मिळतील, अशी आशा निर्माण झाली आहे. आता उतारवयात विविध आजारांनी ग्रासल्यामुळे हा सगळा खर्च करणे अतिशय कठीण झाले आहे. त्यामुळे आमच्या हक्काचे पैसे मिळवून द्या, असे भावनिक पत्र एका ठेवीदाराने पुणे आर्थिक गुन्हे शाखेच्या उपयुक्त भाग्यश्री नवटके यांना पाठविले आहे.
आत्माराम दामू जगताप (वय वर्षे ६९ धंदा – रिटायर रा. मु. पो. येवला, ता. येवला जि. नाशिक) यांनी नवटके मॅडमांना पाठवलेल्या पत्रात म्हटले आहे की, मी आत्माराम दामू जगताप बीएचआर सोसायटी जळगाव या संस्थेचा एक ठेवीदार आहे. जितेंद्र कंडारे सो. यांनी सांगितल्याप्रमाणे २० टक्के रक्कम मिळेल. मूळ पावती संस्थेकडे जमा करा. त्याचप्रमाणे संजीवनी ठेव योजनेत माझे १०,५७,८४९ /- रुपये ठेव होती. (खाते क्रमांक – ०२३७१३००७२५५) दि. २० जानेवारी २०१५ जमा होती. तसेच चालू खाते नं. ०२३७१०१०८४६६ मध्ये २,१०,००० रुपये आहेत. त्यापैकी १०,५७,८४९ /- रुपये मूळ ठेव पावती जळगाव येथील ऑफिसमध्ये तिकीट लावून जमा केलेली आहे. त्यामुळे मोबदल्यात फक्त २० टक्के रुपये महाराष्ट्र बँक येवला येथे जमा झाले. २०१७ मध्ये त्यानंतर अद्याप अनेक प्रयत्न करून काही मिळाले नाही.
बीएचआर कडील एफडी चे पैसे मिळावेत यासाठी १) कृषी मंत्री, नवी दिल्ली, २) मा. पंतप्रधान नरेंद्र मोदी, ३) जिल्हा तक्रार निवारण न्याय मंच कडे अर्ज केले. मा. पंतप्रधान, कृषि मंत्रालय यांचे कडून आलेले पत्र श्री. कंडारे यांच्याकडे दिले परंतु त्यांनी आमच्या समक्ष बाजूला फेकून दिले. पैसे नाहीत, दररोज अनेक येतात तुम्हाला काय करायचे ते करा पैसे मिळणार नाही. असे बोलून तेथे ठेवलेल्या गुंडांना सांगून यांना बाहेर हुसक असे सांगत ऑफिसच्या बाहेर केले.
पत्नीचे सौ. चंद्रकला आत्माराम जगताप वय वर्षे ५५ धंदा – घरकाम पाठीच्या मणक्याचे ऑपरेशन करणे गरजेचे आहे. त्यासाठी २०१० मध्ये ज्युनियर हॉस्पिटल अंबड (नाशिक) यांचे सर्टिफिकेट व अंदाजे खर्च इस्टिमेट बीएचआरकडे पाठविले होते. तरी कोणताही विचार केला नाही. ऑपरेशन न करता आल्यामुळे आज पत्नीला पायाला अपंगत्व आले.
माझे स्वतःचे बायपास, डायबिटीज, बीपी आहे. १४ जुलै २०२० रोजी गँगरीनमुळे डाव्या पायाचे ९ इंच जखम, ड्रेसिंग, गोळ्या चालू आहे. हा सगळा खर्च करणे अतिशय कठीण झाले आहे. त्या पेक्षा मरण बरे असे वाटते. परंतु तुमच्या कर्तव्यमुळे आम्हाला आशा वाटायला लागली. लवकरच पैसे मिळतील असे वाटते तरी कृपा करून आम्हाला पैसे मिळण्याच्या कामी सहकार्य करावे ही विंनती !
