जळगाव (प्रतिनिधी) बीएचआर घोटाळ्यातील मुख्य संशयित सुनील झंवरची पोलीस कोठडी संपल्यानंतर त्याला आज न्यायालयात हजर करण्यात आले होते. दरम्यान, झंवरने काही महत्वपूर्ण गोष्टी मान्य केल्या आहेत. तर अनेक गोष्टी नाकारल्या. तसेच अनेक प्रश्नांना उडवाउडवीची उत्तरे दिली असल्याचे आज सरकारी पक्षाने न्यायालयाने निदर्शनास आणून दिले.
झंवरकडे केलेल्या तपासात निष्पन्न झालेल्या काही ठळक बाबी
१) टेंडर भरणारे जास्तीत जास्त इसम आपल्याशी संबंधित असल्याची बाब झंवरने मान्य केले आहे. परंतु त्यांना मालमत्ता खरेदी करीता पैसे का दिले? याबाबत उडवाउडवीची उत्तरे दिली.
२) सुनील झंवरने त्याचे व मुलाच्या मालकीच्या / भागीदारीतील विविध कंपन्या/फर्ममधील आर्थिक व्यवहार एकत्रित असल्याचे मान्य केले.
३) सुनील झंवरने बीएचआर पतसंस्थेची मालमत्ता खरेदीसाठी ठेवीदार राजेंद्र इंगोले, मधुकर पितांबर झंवर व उषा मधुकर झंवर यांच्या ठेव पावत्या स्वतः खरेदी करुन वर्ग केल्याचे मान्य केले.
४) कर्जदारांचे कर्ज ठेवीदारांच्या पावत्या २० ते ३५ टक्के रक्कमेमध्ये खरेदी करुन कर्ज निरंक केलेल्या राहुल सुभाषचंद बोहरा, जामनेर, छगन झाल्टे, चंदुभाई पटेल, जितेंद्र रमेश पाटील, प्रेम नारायण कोगटा, धरम सांकला यांना व पावत्या गोळा करणारे एजंट अनिल पगारीया, उदयकुमार कांकरीया, अजय ललवाणी, आकाश माहेश्वरी, विवेक ठाकरे, रमेश जैन, अजय जैन, अशोक रूणवाल यांना ओळखत असल्याबाबत सांगितले आहे.
५) बीएचआर पतसंस्थेचा सॉफ्टवेअर बनवणारा कुणाल शहा याने आपल्या साई सेवा पार्सल या कंपनीचे सॉफ्टवेअर यापूर्वी बनविल्याचे व त्यांचे आर्थिक संबंध असल्याचे ले सुनील झंवरने मान्य केले आहे.
६) गुन्हा दाखल झालेपासुन आपण इंदौर व नाशिक येथे राहिला असल्याचे सुनील झंवरमी तपासात सांगितले आहे. अटक आरोपीस नाशिक येथे नेऊन तपास करण्यात आला. तसेच इंदौर येथे अवसायक कंडारे यांच्या ओळखीच्या व्यक्तीकडे राहत असलेबाबत सांगितले. परंतू त्या व्यक्तीच्या नाव, पत्त्याबाबत सविस्तर माहिती दिलेली नाही.
७) झंवरच्या राहते घर व कार्यालय झडती पंचनाम्यामध्ये मोठ्या प्रमाणात दस्तऐवज व इलेक्ट्रॉनिक पुरावा जप्त करण्यात आले होते. ते सर्व दस्तऐवज व इलेक्ट्रॉनिक पुरावे त्यास दाखविला असता त्यातील काही बाबी मान्य केल्या.परंतु काही बाबीबाबत संयुक्तीक माहिती दिलेली नाही.
८) कर्जामध्ये ठेवी वर्ग करण्याकरीता ठेवी आणुन देणा-या एजंट आकाश माहेश्वरी हा आपल्या शालेय पोषण आहाराचा ठेकेदार असल्याचे झंवरने मान्य केले आहे.
९) अटक आरोपीच्या कार्यालयातुन जप्त करण्यात आलेल्या इलेक्ट्रॉनिक पुराव्याच्या फॉरेन्सिक ऑडिट दरम्यान झंवरचे राजकिय व इतर व्यक्तींशी आर्थिक लागेबांधे असल्याचे पुरावे मिळुन आले आहेत. याबाबत झंवरने मंगेश चव्हाण यांच्या सोबत आर्थिक संबंध असल्याचे मान्य केले आहे.
१०) कार्यालयामध्ये रमेश उमाळे हा टायपिंगचे काम करत होता. तसेच सुनिल कलंत्री व दिपक शिंदे हे अकाऊटंटचे काम आपल्या सांगण्याप्रमाणे करत असल्याचे सुनील झंवरने मान्य केले आहे.
