भुसावळ (प्रतिनिधी) एका मंदिरात साफसफाई करताना वीज तारांना स्पर्श झाल्याने दोन तरुण मजूर खाली पडले. त्यापैकी एकाचा मृत्यू, तर दुसरा जखमी झाल्याची दुर्दैवी घटना शहरातील गवळी वाड्यात मंगळवारी सकाळी घडली.
संतोष पंडीत भस्के (वय २६, रा. वाडी खुर्द, तहसील पालम, जि. परभणी, ह.मु.भुसावळ) असे मृत, तर महादू सुभाषराव कंचटे (वय २२, रा. मिर, ता. लोहार, ता. नांदेड) असे जखमीचे नाव आहे. मंगळवारी सकाळी साडेनऊ वाजेच्या सुमारास संतोष भस्के आणि महादू कंचटे हे दोघे गवळीवाड्यात एका मंदिराच्या बांधकाम स्थळी मजुरीचे काम करत होते. बुधवारी मंदिराच्या प्लॅस्टरच्या कामाला सुरूवात होणार होती. त्यासाठी मंगळवारी साफसफाई करताना संतोष व महादूला विजेचा धक्का लागून ते खाली पडले. माजी नगरसेवक राजेंद्र नाटकर व स्थानिकांनी दोघांना तातडीने खासगी रुग्णालयात हलवले. पण, डॉक्टरांनी संतोष भस्के यांना मृत घोषित केले. तर जखमी महादू यांच्यावर प्राथमिक उपचार करून घरी सोडण्यात आले.
