भुसावळ (प्रतिनिधी) पालिकेचे माजी लोकनियुक्त नगराध्यक्ष रमण भोळे यांच्यासह नऊ नगरसेवकांना राज्याच्या नगरविकास विभागाने सहा वर्षांसाठी अपात्र ठरविले आहे.
जिल्हाधिकाऱ्यांचा आदेश कायम
माजी मंत्री एकनाथ खडसे यांच्या नेतृत्वात भाजपतून राष्ट्रवादी काँग्रेसमध्ये दाखल झालेले माजी लोकनियुक्त नगराध्यक्षांसह ९ नगरसेवकांवर जिल्हाधिकाऱ्यांनी १८ जुलैला अपात्रतेची कारवाई केली होती. यानंतर नगरसेवकांनी नगरविकास विभागाकडे अपिल दाखल केले होते. मात्र, नगरविकास विभागाच्या प्रधान सचिव डॉ. सोनिया सेठी यांनी १८ ऑक्टोबरला हे अपील फेटाळून जिल्हाधिकाऱ्यांचा आदेश कायम ठेवला. नगराध्यक्ष रमण भोळेंसह ९ नगरसेवक १८ डिसेंबर २०२१ पासून पुढील सहा वर्षांसाठी अपात्र ठरवण्यात आले. भुसावळातील खडसे गटाला हा मोठा धक्का मानला जात आहे. माजी मंत्री आ. एकनाथराव खडसे यांनी राष्ट्रवादीत प्रवेश केल्यानंतर या ९ जणांनी राष्ट्रवादीत प्रवेश केला होता.
उपमुख्यमंत्री अजित पवार यांच्या उपस्थितीत केला होता राष्ट्रवादी प्रवेश !
पालिकेच्या २०१६ मधील सार्वत्रिक निवडणुकीत भाजपच्या कमळ चिन्हावर विजयी झालेले लोकनियुक्त नगराध्यक्ष रमण भोळे व ९ नगरसेवकांचा पंचवार्षिक कार्यकाळ २९ डिसेंबर २०२१ रोजी पूर्ण होणार होता. मात्र, यापूर्वीच त्यांनी १७ डिसेंबर २०२१ रोजी तात्कालिन उपमुख्यमंत्री अजित पवार यांच्या उपस्थितीत राष्ट्रवादी काँग्रेसमध्ये प्रवेश केला. या प्रकरणी भाजपच्या नगरसेविका पुष्पा बतरा यांनी जिल्हाधिकाऱ्यांकडे २९ डिसेंबर २०२१ रोजी अपात्रतेची याचिका दाखल केली. सुनावणीअंती तात्कालिन जिल्हाधिकारी अभिजित राऊत यांनी १८ जुलै २०२२ रोजी लोकनियुक्त नगराध्यक्ष मिळून १० नगरसेवकांना अपात्र केले.
लवकरच औरंगाबाद खंडपिठात दाद मागू : खडसे
या प्रकरणी अपात्र नगरसेवकांनी नगरविकास विभागाकडे अपिल केले. त्यावर नगरविकास विभागाच्या प्रधान सचिव डॉ.सोनिया सेठी यांनी मंगळवारी जिल्हाधिकाऱ्यांचा १८ जुलैला निकाल कायम ठेवला. नगरसेवकांचे अपिल फेटाळून अपात्रता कायम ठेवली. माजी मंत्री खडसे गटाच्या नगरसेवकांतर्फे अॅड. हरिश पाटील यांनी काम पाहिले. दरम्यान, हा निर्णय सरकारकडून अपेक्षितच होता, त्यामुळे आम्ही आधीच अपिल केले होते. नगरविकास विभागाच्या निर्णयाविरूद्ध आम्ही लवकरच औरंगाबाद खंडपिठात दाद मागू, अशी प्रतिक्रिया आमदार एकनाथराव खडसे यांनी दिली आहे.
