पणजी (वृत्तसंस्था) मुख्यमंत्री एकनाथ शिंदे यांच्यासोबत शिवसेनेचे सर्व बंडखोर आमदार व सहयोगी आमदार गोव्याहून मुंबईकडे नुकतेच रवाना झाले आहेत. बंडखोर आमदारांना आधी गोव्यातील ताज हॉटेलमधून ट्रॅव्हल बसने विमानतळावर नेलं जात आहे. तेथून हे आमदार विमानाने मुंबईला येतील. त्यांच्यासाठी विशेष विमानाची सोय करण्यात आली आहे.
विधानसभा अध्यक्षपदाच्या निवडणुकीसाठी भारतीय जनता पार्टी आणि महाविकास आघाडीने आपल्या उमेदवारांची नावे घोषित केली आहेत. भाजपाकडून राहुल नार्वेकर तर महाविकास आघाडीकडून शिवसेनेचे आमदार राजन साळवी यांना उमेदवारी देण्यात आली आहे. उद्या ३ जुलै रोजी ही निवडणूक पार पडणार आहे. यामुळेच मुख्यमंत्री एकनाथ शिंदे यांच्यासोबत शिवसेनेचे सर्व बंडखोर आमदार व सहयोगी आमदार गोव्याहून मुंबईकडे रवाना झाले आहेत. विशेष म्हणजे मुख्यमंत्री शिंदे यांनी आपली सुरक्षा बाजूला ठेऊन आमदारांसोबत प्रवास करत आहेत. बंड करून महाराष्ट्र सोडल्यानंतर ११ दिवसांनी हे बंडखोर आमदार पुन्हा महाराष्ट्रात परतत आहेत. हे आमदार आधी सुरत, नंतर गुवाहाटी आणि शेवटी गोव्यात आले होते.
