जळगाव (प्रतिनिधी) जळगाव लोकसभा मतदार संघात उमेदवार बदलाची मोठी चर्चा सुरु आहे. दिल्लीत भाजपच्या अंतर्गत गोटात मोठी खलबत सुरु असून अचानक रोहित निकम यांच्या नावावर गंभीररित्या चर्चा सुरु असल्याचे वृत्त समोर आले आहे. तर अन्य काही इच्छुक उमेदवारांची लॉबिंग सुरु केली आहे. परंतू उपमुख्यमंत्री देवेंद्र फडणवीस आणि मंत्री गिरीश महाजन यांच्या संमतीनेच राज्यासह जळगाव आणि रावेर लोकसभा मतदार संघातील अंतिम उमेदवार निश्चित केला जाणार असल्याचे बोलले जात आहे. विशेष म्हणजे रोहित निकम हे फडणवीस आणि महाजन यांच्या गोटातील असल्यामुळेच त्यांची लोकसभेची लॉटरी लागण्याची शक्यता बळावली आहे.
निकामांमुळे दोन्ही लोकसभा मतदार संघात फायदा !
भारतीय जनता पक्षाने खानदेश किंबहुना महाराष्ट्रातील लोकसभेच्या निवडणुकीसाठी मतदार संघ निहाय उमेदवार घोषीत केलेले नसले तरी बहुंताश चेहरे निश्चित केले असल्याचे बोलले जात आहे. तर काही नावावर अंतिम विचार सुरू आहे. रोहित निकम यांच्या मित्रांचा आणि नातेवाईकांचा गोतावळा जिल्ह्यात विस्तारलेला आहे. तसेच रोहित यांचे आजोबा बॅरिस्टर देवराम निकम हे चोपडा मतदार संघातून 1955 ते 1959 ला आमदार म्हणून निवडून आले होते. आजही निकम परिवाराचा चोपडा विधानसभा मतदार संघात मोठा जनसंपर्क आहे. त्यामुळे भाजपने त्यांना उमेदवारी दिल्यास रावेर मतदार संघातील उमेदवारालाही या गोष्टीचा मोठा फायदा होऊ शकतो.
ग्रामीण भागातील शेवटच्या कार्यकर्त्यापर्यंत थेट संपर्क !
सहकार क्षेत्रातील उदयोन्मुख युवा नेता म्हणून जळगाव लोकसभा मतदासंघातील रोहित निकम यांच्याकडे बघितले जाते. तसेच निकम हे आयटी सेक्टरमध्ये काम करत असल्यामुळे त्यांचा जिल्ह्यासह राज्यातील तरुणांशी थेट संपर्क आहे. शिवाय बुथ कमेटीवरही ते काम करीत असल्याने भाजपाच्या शहरी, ग्रामीण भागातील शेवटच्या कार्यकर्त्यापर्यंत त्यांचा असलेल्या थेट संपर्क त्यांच्यासाठी मोठी जमेची बाजू आहे. एकंदरीत सर्व जमेच्य बाजूला लक्षात घेता रोहित निकम यांचे नाव आघाडीवर नव्हे तर जवळपास निश्चित मानले जात आहे. अगदी पक्षश्रेष्ठींकडून रोहित निकम यांच्या नावाबाबत संसदीय बोर्डाच्या बैठकीत सकारात्मक चर्चा झाल्याचे कळते.
जिल्ह्यातील मंत्र्यांसह मतदार संघातील आमदारांसोबत सलोख्याचे संबंध !
मराठा समाजातील एक नवीन चेहरा आणि निकम कुटुंबाची सामाजिक प्रतिष्ठा लक्षात घेता रोहित निकम यांचे नाव सर्वात आघाडीवर असल्याचे दिसून येत आहे. विशेषत: भाजपचे नेते तथा ग्राम विकास मंत्री गिरीश महाजन, आमदार मंगेश चव्हाण यांचे ते विश्वासू सहकारी म्हणून ओळखले जातात. एवढेच नव्हे तर पालकमंत्री गुलाबराव पाटील, मंत्री अनिल पाटील, आमदार किशोरआप्पा पाटील, आमदार चिमणराव पाटील यांच्यासह महायुतीतील प्रमुख नेत्यांसोबत सलोख्याचे संबंध आहेत. सूत्रांनी दिलेल्या माहिती नुसार मतदार संघातील लोकप्रतिनिधींसोबत असलेले मैत्रीपूर्ण संबंधच रोहित निकम यांच्यासाठी प्रभावी ठरणार असल्याचे कळते.
…म्हणून संसदीय बोर्डाचे सदस्य सकारात्मक विचार !
जळगाव जिल्ह्याच्या सहकार क्षेत्रातील नवी पिढीतील प्रभावी व्यक्तीमत्व म्हणून त्यांची वेगळी ओळख निर्माण झाली आहे. विद्यमान खासदार उन्मेष पाटील यांना रीप्लेस करून नव्या दमदार चेहऱ्याला तसेच निवडून येण्याची हमखास शक्यता गृहीत धरून निकम यांच्या नावाचा विचार भाजपच्या संसदीय बोर्डाचे सदस्य सकारात्मक विचार करत असल्याची चर्चा आहे. तथापि राजकारणातील काही बाबी या शक्यतांचा खेळ म्हणूनच बघितले जाते. लोकसभा निवडणुकीसाठी रोहित निकम यांच्या नावाची चर्चा वरीष्ठ पातळी वरून सुरू असल्याने या चर्चेला अधिकच महत्व आले आहे. दरम्यान, जळगाव लोकसभेसाठी चाळीसगावचे विद्यमान खासदार उन्मेश पाटील यांचे तिकीट कट झाल्यास भाजपाकडून युवा चेहरा असलेल्या रोहित निकम यांना संधी मिळण्याची शक्यता यामुळेच वाढल्या आहेत. विद्यमान खासदार उन्मेश पाटील वा रोहित निकम यांनी संधी न मिळाल्यास माजी खासदार ए.टी.नाना पाटील व माजी आमदार स्मिता वाघ यांच्या नावाचाही विचार होवू शकतो, असेदेखील सूत्रांकडून समजते.
जळगाव जिल्ह्यात नातेवाईकांसह मित्र परिवाराचा मोठा गोतावळा !
रोहित निकम हे जळगाव जिल्हा मार्केटींग फेडरेशनचचे संचालक, तसेच जिल्हा दूध संघाचे संचालक ‘कृभको’मुबंई चे सदस्य आहेत तसेच इतर सहकार संस्थावर ते सदस्य म्हणून कार्य करीत आहेत. त्यांच्या मातोश्री शैलजा दिलीप निकम या जिल्हा बँकेच्या संचालक आहेत तसेच माजी जिल्हा परीषद सदस्याही आहेत. वडिल दिलीप निकम हे प्रगतीशील शेतकरी असून तर काका अॅड.उज्वल निकम हे राज्याचे विशेष सरकारी वकिल आहेत. एवढेच नव्हे तर, रोहित निकम यांचे आजोबा बॅरिस्टर देवराम निकम यांच्या नावाला जळगाव जिल्ह्यात एक वेगळं सामाजिक आणि राजकीय,सामाजिक वलय आहे. यामुळे जळगाव लोकसभाच नव्हे तर रावेर मतदार संघातही याचा लाभ भाजप उमेदवाराला होऊ शकतो, असे बोलले जात आहे.
