मुंबई (वृत्तसंस्था) भाजपाचे नेते आणि आमदार आशिष शेलार यांना कोरोनाची लागण झाली आहे. खुद्द आशिष शेलार यांनीच आपल्याला कोरोनाची लागण झाली आहे, अशी माहिती ट्वीट करून दिली आहे.
आशिष शेलार यांना बुधवारी कोरोनाची लागण झाल्याचं निष्पन्न झालं. तशी माहिती त्यांनी रात्री उशीरा ट्विटरद्वारे दिली. माझी कोरोनाची चाचणी ही पॉझिटिव्ह आली आहे. त्यामुळे वैद्यकीय डॉक्टरांच्या सल्ल्यानुसार पुढील उपचार घेत आहे, अशी माहिती शेलार यांनी दिली. तसंच, माझ्या संपर्कात जे कुणी कार्यकर्ते, पदाधिकारी असतील त्यांनी योग्य ती वैद्यकीय काळजी घ्यावी, कोरोनाचे लक्षण जाणवल्यास चाचणी करून घ्यावी, असं आवाहनही आशिष शेलार यांनी केलं.
भाजपचे आमदार मंगलप्रसाद लोढा यांना सुद्धा कोरोनाची लागण झाली आहे. लोढा यांचा रिपोर्ट आज पॉझिटिव्ह आढळून आला आहे. भाजपचे विरोधी पक्षनेते देवेंद्र फडणवीस यांनी ट्वीट करून लोढा यांना आरोग्याची काळजी घेण्यास सल्ला दिला होता.
दरम्यान, राज्य सरकारकडून कोरोनाबाधित रुग्णांची आकडेवारी प्रसिद्ध करण्यात आली आहे. राज्यात गेल्या २४ तासांमध्ये ३९,६२४ रुग्ण बरे होऊन घरी परतले आहे. आजपर्यंत एकूण २९,०५,७२१कोरोना बाधित रुग्ण बरे होऊन घरी परतले. यामुळे राज्यातील रुग्ण बरे होण्याचे प्रमाण ८१.२१ एवढे झाले आहे. आज राज्यात ५८,९५२ नवीन रुग्णांचे निदान झाले आहे. तर २७८ कोरोनाबाधित रुग्णांच्या मृत्यूंची नोंद झाली आहे. सध्या राज्यातील मृत्यूदर १.६४ टक्के एवढा आहे.
