कोलकाता (वृत्तसंस्था) भारतीय जनता पक्षाचे राष्ट्रीय अध्यक्ष जे.पी. नड्डा यांच्या ताफ्यावर हल्ला करण्यात आल्याचं समजतं. पश्चिम बंगालच्या अयोध्या नगरजवळ जे.पी. नड्डा यांच्या ताफ्यावर हल्ला करण्यात आला आहे. तृणमूल काँग्रेसच्या कार्यकर्त्यांचा यात हात असल्याचा आरोप भाजपकडून करण्यात येत आहे.
२०२१ मधील निवडणुकीच्या पार्श्वभूमीवर जे पी नड्डा कार्यकर्त्यांना भेटण्यासाठी पोहोचले होते. कैलाश विजयवर्गीय यांच्या ताफ्यावरही हल्ला करण्यात आला असून दगडफेक करण्यात आली आहे. कैलाश विजयवर्गीय यांनी कारमधून प्रवास करतानाचा एक व्हिडीओ शेअर केला आहे. यामध्ये त्यांचा ताफा जात असताना रस्त्यावर निषेध करत मोठ्या प्रमाणात घोषणाबाजी होत असल्याचं दिसत आहे दगडफेक करत गाडीच्या काचाही फोडल्याचं दिसत आहे. व्हिडीओमध्ये गाडीमध्ये आलेला दगडही त्यांनी दाखवला आहे. दक्षिण २४ परगनामध्ये टीएमसी आणि भाजप कार्यकर्त्यांमध्ये बाचाबाची झाली. भाजपचे अध्यक्ष जेपी नड्डा यांच्या ताफ्यावर टीएमसीच्या कार्यकर्त्यांनी हल्ला करण्याचा प्रयत्न केला, असा आरोप भाजपचे प्रदेशाध्यक्ष दिलीप घोष यांनी केला आहे. नड्डा यांचा ताफा रोखण्याचा टीएमसीच्या कार्यकर्त्यांनी केला. टीएमसीच्या कार्यकर्त्यांनी भाजपच्या ताफ्यावर दगडफेक केली.
“बंगाल पोलिसांना जे पी नड्डा यांच्या कार्यक्रमाची माहिती देण्यात आली होती. पण पुन्हा एकदा बंगाल पोलीस अपयशी ठरली. पोलिसांसमोर तृणमूल काँग्रेसच्या गुंडांनी आमच्या कार्यकर्त्यांना मारहाण केली आणि माझ्या गाडीवर दगडफेक केली,” असं त्यांनी ट्विटमध्ये म्हटलं आहे. याआधी दिलीप घोष यांनी बुधवारी जे पी नड्डा उपस्थित असणाऱ्या भाजपाच्या कार्यक्रमात योग्य सुरक्षा नसल्याचा आरोप केला होता. यानंतर केंद्रीय गृहमंत्रालयाने पश्चिम बंगाल सरकारकडून सविस्तर अहवाल मागवला होता.
